Aizawl; Venghlui Branch YMA chuan kumdanga an lo hman tawh thin angin Ningani kalta zan khan Aizawl Central Hall ah 'Cultural Night' hlawhtling takin an hmang. Cultural Night hmanna hun hi Pu Vanlalruata Ralte, Branch Vice President in a kaihruai a, Art & Culture Minister hlui leh Venghlui Branch YMA President ni bawk Pu K.Vanlalauva chu 'Night Pa' a ni. Venghlui Branch YMA hian kartin Nilaini hi Mizo thuam inbel Ni atan an hmang thin a, Nilaini hian an veng chhunga hmeichhiate chu school naupang leh engemaw tul bik anih loh chuan puan bih turin an ngen a, mipa te pawh Mizo incheina phochhuak zawnga inchei thin turin an ngen thin a, an ngenn hi an zawm tha thin niin YMA hruai tute chuan an sawi. Cultural Night-ah hian Mizo thuam inbelin hun hlimawm tak hman thin a ni a, hei bakah hian Mizo lam chi hrang hrang hmanga intihsiak thin a ni bawk a, kumin ah pawh Cheraw 'Kantluang' hmangin Venghlui Branch YMA hnuaia Section hrang hrangte an intihsiak leh. Venghlui Branch YMA hian kum dangah pawh Cultural Night hi YMA Day dawn-ah an hmang thin a, hemi zana Mizo thuam inbel nalh ber, mipa leh hmeichhe zingah Night Mister leh Night Miss an thlang thin.