Aizawl: Nimin zing dar 8 khan Venghlui Local Council Chairman Vanlalruata Ralte chuan Aizawl Dak Inpui tuala Mel lung phun thar a hawng. Mel lung hawnna inkhawm hi Venghlui Branch YMA President Robert Zosangliana chuan a kaihruai a, hawnna thu sawitu Venghlui Local council chairman Vanlalruata Ralte chuan, “Mizoram mel hlat zawng chu Dak Inpui atanga teh thin a ni a, hei hi mipuite leh thangthar zawk ten an hriat loh kan hlauh avangin Mel lung tehna tur hi kan phun ta a ni,” a ti. Vanlalruata Ralte chuan Mel lung phun turin a mawhphurtu insiamin, document hrang hrangte an lakkhawm hnuah hetiang lungphun hi Venghlui khawtlang chuan an siam ta niin a sawi a. Lungphun siam chu mi thahnemngaite rawtchhuah a nih thu a sawi bawk. Mel lung phun tak hi Venghlui Local Council leh YMA tangkawpte hmalakna a phun a ni a, lungphun hawnna hun tawi hi G.Lalhmingthangi, Venghlui Branch MHIP chuan tawngtaiin a khar a ni.