Aizawl: Venghlui Branch YMA chuan ni 15.6.2018 (Zirtawpni) kalta khan Aizawl Central Hall-ah an branch kum 50 tlin ‘golden jubilee’ an lawm a, tlaiah khawtlang huapin ruai an theh. Golden jubilee lawmna inkhawm hi Lalkohchhuaha, Venghlui Branch YMA President chuan a kaihruai a, khuallian Central YMA President Vanlalruata chuan ruihhlo do kawngah nasa taka tanlak a ngai tih sawiin, “YMA-in tih tak zeta ruihhlo kan do lai chuan ruihhlo vanga thi pawh an tlem a; mahse, tha kan thlah chhungin nasa takin thi an pung leh a. Chuvangin tih tak zeta kan do a ngai a ni,” a ti a. Fa neih tam lamah pawh tanlak a ngai tih sawiin fa neih tamah tanlak a ngai tih a sawi a. “Hnam tlem an ropui ngai lo a, kan tlem lutuk chuan hnamdang ten min chimral mai dawn a ni,” a ti. Vanlalruata chuan sumdawnna kawngah thanharh a ngai tiin, “Kan thenawm state te chu hnamdangin an chimral deuh vek tawh a, hetih lai hian Mizote chuan damkhawchhuahna chance kan la nei a ni,” a ti bawk. Venghlui Branch YMA hian an golden jubilee pual hian sport, thisen pek runpui bakah luanchhuahna programme an hmang a. Ni 1.6.2018 (Zirtawp) zan khan Pisatlang (Treasury Square) leh a chhehvelah a duh apiangte ei turin artui leh thingpui an sem a, ni 2.6.2018 (Inrinni) khan Aizawl leh a chhehvela damdawiin awm zawng zawngah artui leh bawnghnute an sem bakah veng chhung miharsa te hnenah tanpuina thilpek an hlan bawk. Jubilee lawmna pui ber Zirtawpni a neihah hian Se chal, vawk 4, arsa leh thildang hmangin khawtlang huapa ruai theh a ni a, vengchhung mai bakah veng pawn atangin mi eng emaw zatin jubilee ruai hi an theh a. Hriattheih chinah ruaitheh hi mi 3000 bawr vel an ni.