Aizawl: Zalen thudawn danin College of Veterinary Sciences & Animal Husbandry, Selesih a Field-cum-Laboratory Assistant (FCLA) post ruak pahnih hnawhkhahna tura lak mi pahnih chu College of Veterinary Sciences & Animal Husbandry, Jalukie, Nagaland ah appointment pek an ni. Central Agricultural University, Imphal, Manipur chuan September 14, 2016 khan appointment order pahnih a chhuah a. Hetah hian Arunachal Pradesh mi ve ve Ripin Taba leh Onong Tamuk te chu College of Veterinary Sciences & Animal Husbandry, Selesih, Mizoram a Field-cum-Laboratory Assistant (FCLA) post ruak atan lak an nih thu a inziak. Nimahsela heng lak thar mi pahnih te hi remchan zawkna avanga College of Veterinary Sciences & Animal Husbandry, Jalukie, Nagaland-a post an nih thu he order-ah tho hian a inziak a ni. Hetih lai hian August 17, 2016 a Teaching Veterinary Clinical Complex leh New Academic block hawnnaa a thusawiah Central Agricultural University-a Vice Chancellor Prof. M. Premjit Singh chuan September, 2016 ral hma ngeiin faculty post ruak 16 hnawhkhah a ni ang tiin a sawi a, hei hi tih hlawhtlin a la ni lo niin Zalen chuan thu a dawng a ni. Zalen thudawn danin College of Veterinary Sciences & Animal Husbandry, Selesih ah hian hnathawktu indaihlohna a nasa em em a, Indian Council of Agricultural Research hnuaia National Agricultural Education Accreditation Board pawhin May 2016 a zirchianna an neihah zirtirtu post siam turin a recommend a ni.