Mizo model te thlenchin a sang zel a, khawvela model lar leh chhe lo ber berte zingah pawh an tel ve ta nawk mai. Bawngkawn nula Angaihi Hlondo chu Ambani chhungkaw ta Jio World Plaza-a Jio High End Mall hawnnaah Victoria Secret model te nen an inlan ho. 

Angaihi Hlondo hi Animacreative Agency hnuaia awm mek a ni a, Mizo model zinga hmabak nei eng berte zinga mi a ni. October 31, 2023 (Thawhlehni) khan Jio World Plaza-ah Ambani Jio High End Mall hawnna hi neih a ni a, he launch event-ah hian India top model bakah Victoria Secret model pawh an inlan a ni. 

Victoria Secret model Elsa Hosk leh Plus Size super model Ashley Graham te kiangah Mizo nula Angaihi Hlondo a inlan a, Mizo model zinga khawvel top model ho nena thawkho hmasa ber a ni hial mai thei.

He luxury mall hawnnaah hian Bollywood star - Priyanka Chopra, Ranveer Singh, Alia Bhatt leh Shah Rukh Khan te pawh an inlan a, Ambani family te leh India rama sumdawng hrawl tak tak tel an thahnem hle a ni. 

Angaihi Hlondo hi Joseph Lalrinliana leh R. Lalhminghluni te fa niin, Bawngkawn, Aizawl-ah chhungkuain an cheng mek a ni.