India rawlthar kum 16 hnuai lamte inelna, Vijay Merchant Trophy 2023-24-ah Mizoram chuan Arunachal Pradesh hnehin a group-ah pathumna dinhmun an luah mek.

Nilaini atanga Ravenshaw University Ground 1, Cuttuck, Odisha-a inkhelah hian Arunachal Pradesh batter-ten Zemabawk rawlthar, Lalnunzira an ngam lo hle a, thawh (innings) hnih a vawmah mi 11 zet a vawm hlum a, Zirtawpni khan Mizoramin hnehna an chang.

Nunzira hian 1st innings-ah over 11 chauh a vawm hman tihah batter pakua zet a vawm hlum hman a, run 19 chiah a pe bawk a. A mi mal taka a chet that zarah Arunachal Pradesh hian run 43 chauh a siam tling thei a ni.

Mizoramin vaw zui vein Lalpekhlua’n run 66 a thawh a, Zothangpuia leh C. Laldinpuia ten run 38 ve ve an thawh bawk a, mi pakua an thihin run 231 an tlin a, an duhtawk (declared) zui ta a ni.

Arunachal Pradesh-in a thawh hnih nan vaw chhunzawm ve lehin Mizo bowler Lawmkima an ngam lo ve thung a, run 88 chauh tlin leh theiin innings hniha an run siam belhkhawmin Mizoram rawltharte vawi khat thawh chhuah chu run 100 zetin an um phak chuang lo va. Mizo rawltharte thawh leh pawh ngai lovin innings leh run 100-in hnehna an chang a ni.

Arunachal Pradesh thawh hnihnaah hian Lawmkima bakah Nunzira bawk a che tha leh a, mi pahnih a vawm hlum leh a ni.

Vijay Merchant Trophy hi Board of Control for Cricket in India (BCCI)-in state hrang hrang rawltharte inel nana kum tin a buatsaih thin a ni a. Mizoram hi kuminah hian Plate Group-ah a awm a ni.

An group-ah hian Manipur, Nagaland, Sikkim, Meghalaya leh Arunachal Pradesh te nen awmin vawi hnih theuh an khelh tawhah pathumna an ni mek a. Vawi thum khelh an la hmabakah Thawhtanni atang hian Sikkim an hmachhawn leh ang.

An khelh hmasak berah Manipur lakah an tlawm a. An hmabakah hian Sikkim bakah Nagaland leh Meghalaya an la awm.

Plate Group hi Elite Group-a awm state-te nen inelna hrana kal an ni a. Plate Group-a a sang pali hian semi final an lut dawn a, Mizoram hi khelh hnihah pathumna dinhmun an luah mek avangin a thiam pali zinga tel thei dinhmunah a ding rih mek a ni.