Mizo rawltharten khelh thumah vawi hnih hnehna chang tawhin Vijay Merchant Trophy-ah an group-ah pahnihna dinhmun an luah mek a, semifinal luh an hnaih ta hle.

India ram pum huapa cricket hmanga state hrang hranga kum 16 hnuai lamte inelnaah hian Manipur an ngam loh hnuah Arunachal Pradesh sawpin Sikkim an hneh leh a. Plate Group-a state paruk awm zingah pahnihna dinhmun an luah mek.

Mizo rawltharte hian an inlan vawi thumnaah Nilaini khan Sikkim hi thawh khatna (first innings)-a Immanuel Lalpekhlua century vuak chhuah chhawrin run 125-in an hneh.

Thawhtanni atanga Ravenshaw University Ground 1, Cuttack, Odisha-a inkhelah hian Mizoram hian first innings-ah run 399 siama mi pakua an thihah an duhtawk (declare) a. Arunachal Pradesh an sawp tuma che tha tak, run 66 vaw chhuaktu, Immanuel-a bawk che tha lehin ball 258 a hmachhawnah run 167 zet a siam a ni.

Immanuel-a bakah hian Malsawmhlua (run 79) leh Zodinsanga (run 45) ten an thawh hlawk hle bawk.

Sikkim-in vuak chhunzawm vein run 244 an tlinin an thi vek a, Arunachal Pradesh batter 11 zet lo vawm hlum tawhtu, Zemabawk rawlthar, Lalnunzira bawk a vawm lamah hian Mizoram tan che tha lehin chuan mi panga zet a vawm hlum leh.

Thawh hnihnaah erawh Mizoram an che tha ta lo thung a, run 70 chauh an tlin thei a. Sikkim tan vuak hmasak nen belhkhawmin run 192 umphak tur an neih chu sang ni lo mah se Mizoram bowler an ngam leh ta chuang lo va, run 67 an siamah thi leh vekin Mizo rawltharte hian run 125-in an hnehna an chang a ni.

Mizoramin an vawm vawi hnihnaah hian Nunzira leh Zodinsanga te an che tha a, pathum ve ve an vawm hlum.

Vijay Merchant Trophy hi Board of Control for Cricket in India (BCCI)-in kum tin a buatsaih thin a ni a. Mizoram hi kuminah hian Plate Group-ah an awm.

A group-ah hian Manipur, Nagaland, Sikkim, Meghalaya leh Arunachal Pradesh te nen awmin vawi thum theuh an khelh tawhah point 13 nen pahnihna  an ni mek a. Vawi hnih khelh an la hmabakah an hnuaia mite ve ve an tum dawn a, Inrinni atang hian Nagaland an hmachhawn leh ang a, Meghalaya an la hmabak bawk.

Plate Group hi Elite Group-a awm state-te nen inelna hrana kal an ni a. A sang paliin semi final an luh theih dawn avangin tun dinhmunah hian Mizo rawltharte tan a thiam pali zinga tel theihna remchang a inhawng zau rih hle a ni.