India rama rawlthar kum 16 hnuai lamte inelna, Vijay Merchant Trophy 2023-24 khelh mekah Mizoram chuan Plate Group khelh linaah Meghalaya hneh lo mah se khat an la nei a, semifinal luh ngei an inbeisei.

Mizo rawltharte hian an khelh vawi linaah Inrinni atang khan KIIT Cricket Stadium, Bhubaneswar, Odisha-ah Meghalaya hmachhawnin Thawhtanni khan wicket liin an hneh lo va; mahse, Sikkim leh Arunachal Pradesh an lo hneh tawh avangin semifinal luh theih ngei an inbeisei zui tho.

An hmabaka la awm, Nagaland nen Ningani atang hian DRIEMS Ground, Cuttuck, Odisha-ah an hmachhawn leh dawn a, hetah hian point an hmuh phak chuan semifinal hi an lut thei dawn.

Plate Group-ah hian state paruk awmin Mizo rawltharte hian palina dinhmun an hauh mek a. An hnuai chiaha awm, Sikkim-in hneh la nei lo, Arunachal Pradesh an hmachhawn leh dawn a, bonus point hmu pha lova an chak pawhin Mizoram nen an point inzat ang a (point 13 ve ve), head-to-head enin Mizoram laka tlawm tawh an nih avangin a tla zawk dawn tho.

Arunachal Pradesh lakah hian Sikkim-in bonus point (point 1) hlawh phaka chakin point 7 hmuh belh mah se Mizoram hian Nagaland lakah point hmuh ngei an inbeisei avangin Sikkim hi a thiam pali zinga luh khalh ngei an inring.

“Semifinal kan luh leh luh loh hi kan kuta awm a ni,” tiin Mizoram coach Lalruatsanga (Atea) chuan ZALEN a hrilh.

“Kan beisei a sang khawp mai. Kan khelh dan pangngaia kan khelh phawt chuan Nagaland hi kan hneh ngei kan inring,” a ti.

Atea hian Meghalaya an hneh loh chungchang pawh sawiin, “A tawp lamah kan bei lét tha a, referee-in min tan lo ve deuh niin ka hria; lbw ngei tur pawh min pe lo a ni,” a ti.

Plate Group-a awmte chu an intluk tlang a, tha fal an awm lo niin a sawi a. An khelh hmasak bera an hneh loh, Manipur pawh kha an vanduai vang niin a sawi a, “Tum leh pawh kan châk hle a ni,” a ti.

Mizoram hian semifinal an lut a nih chuan Manipur hi hmachhawn leh theihna hun remchang, phuba lak theihna an nei thei mai thei nghe nghe a ni.

Vijay Merchant Trophy hi Board of Control for Cricket in India (BCCI)-in kum tin a buatsaih thin a ni a. Mizoram hi kuminah hian Plate Group-ah an awm.

A group-ah hian Manipur, Nagaland, Sikkim, Meghalaya leh Arunachal Pradesh te nen awmin vawi li theuh an khelh tawhah point 13 nen palina an ni mek.