India rama rawlthar kum 16 hnuai lamte inelna, Vijay Merchant Trophy 2023-24-ah Mizoramin final a lut zo ta lo va, semifinal-ah Manipur an hneh lo.

JSCA Oval Ground, Ranchi, Jharkhand-a Nilaini atanga Plate Group semifinal khelhah Mizoram hian Zirtawpni khan thenawm state rawltharte hi innings leh 114-in an hneh lo.

Mizoram hian vaw hmasain thawh (innings) khatnaah bul an tan tha lo nghal a, bul tantu pahnihin run 10 pawh an tlin loh ve ve hnuah wicketkeeper-batsman Lalramluahpuia Zote (Mapuia) chuan run 26 siamin a tawp lamah Lalnunzira’n run 67 thawh veleh mah se mi dangin an puih that tawk loh avangin run 146 chauh tlinin an thi zo vek.

Manipur vuak ve hunah an che tha a, Danish-a’n century a vuak chhuah bakah opner Donba, Rain leh T.Nganba ten half century an siam hlawm bawk a, an thih zawh meuh chuan run 340 zet an vaw chhuak hman.

Mizoramin a vawi hnih nan an vaw veleh a, hetah pawh Zemabawk rawlthar Mapuia’n run 48 a siam bak mi dangin chhuan tham run an vaw chhuak lo va, run 120 chauh siamin an thi kim leh vek.

Manipur-in an tum khat vuak hi Mizoram hian vawi hnih vuakah pawh an umphak tak loh avangin thawh khat leh an phak lohna, run 114 zetin a tlawm zawkah an tang ta a ni.

Tun tum tournament-ah hian Mizoram leh Manipur hi vawi hnih an inkhel a, group stage-a an khelhah pawh Mizoram hian run 156-in an lo hneh lo tawh a ni.

Vijay Merchant Trophy hi Board of Control for Cricket in India (BCCI)-in kum tin a buatsaih thin a ni a. Mizoram hi kuminah hian Plate Group-ah an awm.

A group-ah hian Manipur, Nagaland, Sikkim, Meghalaya leh Arunachal Pradesh te nen awmin an inkhel kual chhuak vek a, Mizoram hi palina niin semifinal an lut pha chiah a ni.

Semifinal pakhat zawkah Meghalaya-in run 72-a Nagaland hnehin final an lut ve bawk a, Keenan Stadium, Jamshedpur, Jharkhand-ah January 3 atang hian final an khel ang.