India rama rawlthar kum 16 hnuai lamte inelna, Vijay Merchant Trophy 2023-24 khelh mekah Mizoram chuan an beisei ang ngeiin Plate Group-ah semifinal an lut ta a. Semifinal-ah hian an hneh loh tawh, Manipur su leh dawn mah se hneh tawh ngei an inring.

Mizo rawltharte hi Ningani atang khan group stage inkhel hnuhnung berah Nagaland nen inhmachhawnin Inrinni khan an inhnehtawk a, thawh (innings) khatnaah hma an hruai zawk avangin bonus point (3) hmuin anmahni umtu, Sikkim chu semifinal an luh khalh.

Inkhel dangah Sikkim hian innings leh run 133-in Arunachal Pradesh hneh ve bawkin bonus point nen point sarih an hlawh chhuak a, Mizoram hi nen an point hmuh inzat thei chiah thei ni mah se Mizo rawltharte hian chak zo lo chunga point thum an hlawh chhuah phak tho avangin an dingchang ta zawk a ni.

Khelh ngaah Mizoram hian point 16 neiin semifinal lut pha chiahin palina dinhmun an hauh va; Sikkim hi point 14 nen pangana an ni ta zawk a ni.

DRIEMS Ground, Cuttack, Odisha-a inkhelah hian Mizoram tan hian wicketkeeper batsman Lalramluahpuia Zote (Mapuia) a che tha hle a, he inkhel bikah hi chuan ‘amah vang’ tia sawi theih hial a ni.

Zemabawk rawlthar hian vuak vawi hnihah century a siam ve ve a. Thawh khatnaah run 115 zet siamin Zodinsanga half century (run 51) nen run 261 an tlin thei.

Nagaland hian umin Aluto Sumi chuan century (run 133) siamin che tha hle mah se a thianten an pui tha tawk lo va, run khatin Mizoram vuak thawh khatna an phak lo.

Mizoram vuak thawh hnihnaah a tir atanga lut, Mapuia’n thi lovin run 104 a tlin leh hman a, captain Lalpekhlua’n run 50 a tlin hman bawk a, khelh hun chhung tura tuk (ni thum) a liam tak avangin inhnehtawka puan an ni ta a. Vuak thawh khatnaa hma hruaitu Mizoramin point an hmu ta zawk a ni.

Mizoram hian khelh ngaah vawi hnih chakin vawi hnih an tlawm a, vawi khat hnehtawk neiin semifinal lut zinga a hniam ber an ni a. Chak loh nei lo, Manipur nen final luh inchuhin an inkhel leh dawn.

Mizoram hian group stage inkhel hmasak berah Manipur hi run 156-in an lo hneh lo tawh a, semifinal-ah phuba lak theihna hun tha an nei dawn a ni.

Mizoram coach Lalruatsanga (Atea) chuan semifinal an lut thei chu Pathian hnehah lawmthu sawi a a. An hneh loh tawh hmachhawn dawn mah se hnehna chan ngei an inbeisei tih ZALEN a hrilh.

“Manipur hi kan khelh hmasak bera kan hneh loh tawh an nih bakah chak loh nei lo awm chhun an ni a, chutih rualin kan khelh chhoh dan en hian kan naute ho pawhin tum leh an châk viau mai a, hnehna chan ngei pawh kan inbeisei,” a ti.

An insu leh dawn tih a chian hma tawhah khan Mizoram coach hian Manipur laka an tlawm chungchang sawiin, “Kan khelh hmasak ber a ni a, kan thlen hlim boruak kha a la ni a, kan vanduai ve deuh bawk a ni,” tiin Nagaland an hmachhawn hmaa Meghalaya an hneh loh hnuah a lo sawi tawh bawk.

Vijay Merchant Trophy hi Board of Control for Cricket in India (BCCI)-in kum tin a buatsaih thin a ni a. Mizoram hi kuminah hian Plate Group-ah awmin state paruk an inel.

Semifinal hi JSCA Oval Ground, Ranchi-ah Nilaini atang hian khelh a ni ang.