ZALEN, Dec. 08, 2024: An vawm leh vuak hmasaka tha taka an thawh zarah Mizo naupangten Vijay Merchant Trophy khelh mekah Pathianni khan Cuttuck, Odisha-ah Arunachal Pradesh chu wicket rukin an hneh.

Board of Control for Cricket in India (BCCI)-in state/association naupang kum 16 hnuai lam tana inelna a buatsaihah hian Mizoram hian an khelh hmasak berah an hmarchhakpui chu an hneh nghal a, an group-ah pahnihna dinhmun an luah mek.

Ravenshaw University Ground 1-a inkhelah hian Arunachal Pradesh hi thum vawrah chakin vuak hmasak an thlang a; mahse, Mizo naupangten an vawm that em avangin an thlang fuh lo a tih theih.

An opener pahnih chu Hmingthanpuia’n run engmah siam lovin a vawm hlum nghal ve ve a, Vansh-a’n run 45 a vaw chhuak tih loh chu Mizo bowler-te hmaah mi dang an che na thei lo va, run 107 chauh tlinin an thi fai vek.

An vawm vawi khatnaah hian Mizoram tan Hmingthana leh Saingurpuia ten mi pali an vawm hlum a, Arunachal Pradesh batter-te hup botu an ni.

Mizoram hian an vuak thawh khatnaah Joel K.Lalthlamuanpuia’n run 65 siamin run 30 thawh tling pathum lai an awm bawk a, run 210 siamin an thi kim.

Arunachal Pradesh hian vaw chhunzawm zuiin vuak hmasaka thawh hlawk ber, Vansh-a leh Krish Galar Basumatary ten run 70 tlin ve ve mah se Mizoram tan an vawm hmasaka Hmingthana leh Saingura vawm hlum bak vawm hlumtu, K.Vanlallawmkima inlar ve thungin wicket li a la leh a; wicket la ve lo, captain Henry Lallawmzuala’n pathum vawm hlum bawkin run 269-ah an vawm hlum kim.

An tumpuiten vuak vawi hniha an run siam belhkhawm chu an vuak hmasaka an siam sa nen Mizo naupangte hian chak tumin an um a. Tha taka bul tan mi pali chiah thiin an mamawh run an thawk chhuak ta a ni.

Vijay Merchant Trophy hi ni khat aia tam khelh chi, thawh (innings) hnih zel khelh a ni a. Mizoram hi Plate Group-ah Arunachal Pradesh bakah Nagaland, Bihar, Tripura leh Sikkim an awmpui a. Nilaini atang hian Bhubaneswar, Odisha-a Vikash Cricket Ground-ah Tripura an hmachhawn leh dawn a ni.

MATCH SUMMARY

Arunachal Pradesh won the toss & chose to bat

Arunachal Pradesh - 107/10 & 269/10

Mizoram - 290/10 & 87/4

Mizoram won by 6 wickets