Season bul tan tha lo, mahse tun hnaia tlawm hreh ve tak Arsenal chuan zirtawpni zan khan Premier League-ah an mikhual Aston Villa FC chu 3-1 in an hneh a, game 9 khelah point 14 hmuin table pakuanaah an inhlangkai a, tlawm zawk Villa hian point 10 hmuin table-ah 13-na a luah thung. 

He inkhelhah hian minute 23-na lekah Smith Rowe-a corner pet tha tak chu Thomas Partey chuan lo tauh lutin Gunners tana a goal hmasa ber a thun a, goal dang pawh a thun teuh hle a, crossbar a pet per dawt bawk.  First half hun tawp dawnah Lacazette-a laka Targett a foul vangin Arsenal lamin penbalty an hlawh chhuak a, Aubameyang-a’n  penalty a pet. Arsenal keeper hlui Emiliano Martinez chuan lo a lo dan sak a, mahse a per let leh chu goal-ah a chan tir ta tho. 

Sihnih faia Arsenal-in hma an hruai laiin first half a zo. Second half an tan a, Villa an insiam rem leh hmain Arsenal bawk an che hmasa leh second half minute 11-naah Smith Rowe chuan Arsenal goal thumna thun lehin si thum faiin hma an hruai. 

Mikhual lamin tlawm mai an tum bik lo, minute 82-ah Leon Bailey siamsak chu yard 20 zet hla atangin Ramsey chuan Aston Villa tan mawi takin a pet lut ve. goal dang luh belh lovin hun a tawp.