Virat Kohli chu tunah chuan one-day international cricket-ah a chung berah a awm ta.

Nilaini zana World Cup semi-final-a New Zealand an hneh tumin India superstar hian a vawi 50 nan century a siam a, Sachin Tendulkar a khum ta.

A hlawhtlinna chan leh batting maestro a khumna hi hi lawmpuitu an tam a, Tendulkar ngei pawhin ‘Indian ngeiin ama record khum lai a hmuh aia hlimna’ a awm loh thu a sawi.

Kohli-a hian record hi Mumbai-a Wankhede Stadium-ah a khum a, he khelmual hi Tendulkar-a khelmual bik niin amah pawhin a en a. A hnuah X-a India chhuanvawr a lawmpuina thu a tar lan rualin national team-a an intawn hmasak ber a tar lang tel bawk.

“Indian dressing room-a ka hmuh hmasak ber tum che khan kan teammate dangte khan ka ke khawihin an lo fiam (prank) che a, kha mi ni khan ka nui tawp thei lo. Mahse, a hnu lamah erawh i tumruhna leh i thiamna hian ka thinlung a khawih a, kha ta tlangval khan ‘Virat’ player-a i lo thang chho ta hi ka lawm tak zet a ni. 

“Indian ngeiin ka record a khum aia hlim theih dan dang a awm chuang lo. I hlen chhuahna hi stage sang, World Cup semi-final a ni a, ka khelmualah ngei a ni bawk,” a ti.

Amah ngei pawh a lawm a, “Mumang rama chen ang mai a ni,” tiin a sawi a. A record siam hi Tendulkar bakah a nupui, Anushka Sharma pawhin a hmunah a en.

“Duhthusam lem ziak thei dawn ta ila, hei ngei hi ziah ka duh chu a ni ang,” tiin a sawi bawk.

“Ka kawppui, ka hmangaih berin min thutpui a. Ka hero Sachin a thu bawk a. Anni hma leh khelmual ropui taka ka vawi 50-na ka tlin thei hi a nuam tak zet a ni,” a ti.

A khum tak, Tendulkar-a chu a ropui ber erawh a la nih reng thu India captain hlui hian a sawi bawk a. “Engah pawh ani chu kan entawn a ni,” tiin kar hmasa khan a lo sawi tawh a. “Ani anga tha hi chu ka ni ngai lo vang, ani chu a bat hian a dik vek mai a ni,” a ti bawk.

Kohli-a hian ni 10 liam taah khan Tendulkar-a’n century vawi 49 a lo siam tawh chu World Cup group stage-ah South Africa lakah a nihrual a, hei hi a piancham chiah a ni bawk a. Nilaini zanah New Zealand lakah run 117 siamin a khum a, India chu mi pali thiin run 397 a tlinpui a, hnehna a chanpui zui.

India innghahna Kohli-a record siam hi mi tam takin an lawmpui bawk a, heng zingah hian Prime Minister Narendra Modi leh Union Home Minister Amit Shah pawh an tel.

Rohit Sharma kaihhruai India team hian New Zealand laka run 70-a hnehna changin final an lut ta a, Ningani zana Australia leh South Africa inkhela chak zawk zawk nen Pathianni zan hian Ahmedabad-a Narendra Modi Stadium-ah final an khel ang.