Zothan Autoworks Pro Volleyball League khelh mekah Bungkawn hmeichhe team-in tha takin bul an tan a, set thum faiin Bethlehem Vengthlang lakah an chak. R Dengthuama Indoor Stadium, Mualpuiah F. Lalparmawii hovin Bungkawnin mittlung takin an khel a, 2019 final-a rilru na taka Durtlang laka an tlawm hnua an inlan leh hmasak berah 25-11, 25-12, 25-23-in Bethlehem Vengthlang an hneh.

F-i'n point 17 hmuin vawi sarih tisual mah se mi malin a langsar fal a, D3 Business Player of the Night lawmman dawngin a kawppui R Malsawmtluangi'n point 10 thawhin point hnih a hloh a, Bungkawn team an chak theih nan an thawh hlawk.

Bethlehem Vengthlangin Pro Volleyball hnuhnung bera player tha ber Lalmuanpuii hovin khel mah se beisei an pha lo va, zuai takin bul an tan a, an arh chhuak leh zo tawh lo. Set hmasa pahnihah Bethlehem Vengthlangin F-i ball vuak an dan theih loh bakah Sawmi'n awmze neiin a khel a, Bungkawn an chungnung a, hneh takin inkhel an awpbet.

Set thumnaah Muani leh Laltluangzeli'n Bethlehem Vengthlang tan beiseina thar siamsakin tlang thei mai turin 22-20-in an sang hman. Mahse, hun pawimawhah Bungkawn an hriam a, ho angreng taka Bethlehem Vengthlangin point hloh thin an tuar bakah Muani'n vaw sualin 24-23-in Bungkawnin an lehpelh a, tang zui lovin an tlang nghal a ni.

Bethlehem Vengthlang tan team fuih phur thei khawpa khel tha an awm lo va, Muani'n point 11 hmu mah se 10 a hloh a, Tluangzelin point sarih thawhin vawi ruk a tisual a, Flora Lalrinmawii'n point paih nei lovin vawi li a hmu na a, a langsar tham lo.

Bungkawnin zirtawpni zanah an khel leh dawn a, championship hnuhnung ber final-a an hneh loh Durtlang laka an tlawmna chhang let turin an inringtawk. Hemi ni tho hian tlaia Bethlehem Vengthlangin chiang taka Durtlang hnehtu Kanan an hmachhawn ve thung ang.

Play stats :

BUNGKAWN
F Lalparmawii : point hmuh 17, point hloh 7
R Malsawmtluangi : point hmuh 10, point hloh 2
FP Lalduhkimi : point hmuh 2, point hloh 3

BETHLEHEM VENGTHLANG
Lalmuanpuii : point hmuh 11, point hloh 10
Laltluangzeli : point hmuh 7, point hloh 6
VL Hmangaihzuali : point hmuh 5, point hloh 5
Flora Lalrinmawii : point hmuh 4, point hloh 0
Lalnunpuii : point hmuh 4, point hloh 2