November 16, 2023; Election Commission of India chuan December ni 3 (Pathianni)-a inthlanna a vote tla chhiar hun chu a sawn dawn lo niin Chief Electoral Officer Mahdup Vyas chuan a sawi.

Chief Electoral Officer Madhup Vyas hi Thawhlehni khan Delhi-ah chhukin Election Commission of India a zu dawr a. Nimin khan Aizawl lo thleng leh tawhin, vote chhiar ni hi sawn a nih dawn loh thu Akashvani Aizawl a hrilh a. “ECI-in inthlana vote tla chhiar hun a lo ruat tawh anga kalpui a ni dawn,” tiin Madhup Vyas chuan a sawi.

Hetihlai hian NGO Coordination Committee chuan vote chhiar ni sawn a nih theih na’n theihtawp an chhuah tur thu an sawi a, bawhzui zel dan tur an rel dawn tih an sawi. A tul chuan ECI dawr tura Delhi a lamkal intirh chungchang pawh an sawi tawh a. Thutlukna erawh chu an la siam lo. Vawi thum lai ECI- hnena vote chhiar ni sawn tura ngenna siam tawh a. MKHC hotute chuan ngenna an siam baka thil kalpui a ngai a nih chuan NGOCC kutah an dah tih an sawi.