Aizawl: Tlawmngai pawl intelkhawm NGO Coordination Committee chuan Mizoram MLA inthlanpui vote chhiar hun sawn anih avangin lawmthu an sawi.

Nimin chhun khan Central YMA office-ah thuthar lakhawmtute kawmin NGOCC chairman Lalhmachhuana chuan, "Vote chhiar hun sawn tur hian kohhran, political party, NGO leh mimal thahnemngai ten theihtawp an chhuah a. Kan beidawn rum rum hnuah Pathian vangin a hlawhtlinna kan hmu a. Vote chhiar hun sawn anih theihna atana hma latu zawng zawng te chungah lawmthu kan sawi a ni," a ti.

Mi thenkhat ten Pathianni chauh ngai pawimawh anga an sawi chu a dik lo tih sawiin NGOCC chairman chuan, "A tir atangin Inrinni leh Pathianni chu a remchang lo tih ECI kan hrilh a. Inkhawm ni ah hetiang hun buatsaih a nih chuan mipuiah harsatna a awm dawn tih kan thlen nghal a ni," a ti bawk.

NGOCC secretary Prof. Malsawmliana pawhin, "Kan hmalakna ah hian beidawn rum rum chang te pawh kan nei a. A tir atangin kan hmalakna ah hian tharum tel lo (non violence) tih chu kan thupui a ni a, hetia a hlawhtlinna kan hmu ta hi lawmawm kan ti tak zet a ni," a ti a. Vote chhiar hun sawn anih avanga lawmthu sawina hi Election Commission of India leh Mizo mipuite ah thuchhuah siama puanzar an tum tih a sawi bawk.

NGOCC member leh MZP President ni bawk H.Lalthianghlima pawhin an duhdan tihhlawhtlin anih chhan chu mipuite tawngtaina Pathian in a chhan vang tih a sawi a. Mizoram Upa Pawl President Nghaklianmawia pawhin thu sawiin ECI thuchhuak chu Mizo mipuite tan hlimna ni a ni tiin a hun takah Pathian a che niin a sawi bawk.