ZALEN November 4, 2023 : Mizoram Kohhran Hruaitute Committee (MKHC)-in Election Commission of India (ECI)-a vote chhiar hun sawn tura ngenna an thlen nawn leh chungchang leh darkar 24 chhunga a chhanna dawn an phutna chungchangah ECI an la ngawi a, he thu buatsaih lai thleng hi chuan inthlan vote chhiar hun tur chu December 3, 2023 (Pathianni) a la ni.

MKHC hruaitute leh Election Department hotute hnen atanga ZALEN thudawn danin inthlan vote chhiar hun sawn tura ngenna chungchangah nimin chawhnu lam thleng khan ECI atangin chhanna dawn a la awm lo a. MKHC hian November 3, 2023, Zirtawpni chawhnu dar 1 khan CEO, Mizoram hnenah vote chhiar ni sawn tura ngenna an thlen nawn leh a, darkar 24 chhung ngeia chhanna dawn an phut tih an lehkhaah an tar lang a ni.

November 2, 2023 zan dar 7 khan MKHC, MPF, political party aiawh leh NGO Coordination Committee-a tel hrang hrangte meeting neiin Mizoram inthlanpui vote chhiar hun, ECI-in December 3 a lo ruat tawh chu December 4 emaw, ni 5 emaw-a sawn tura ngenna thlen leh nise an ti a, chumi ang chuan CEO, Mizoram kaltlangin ECI-ah ngenna hi thlen nawn leh a ni.

Hetihlai hian naktip inthlan tura campaign hun chu vawiin tlai dar 4-ah a tawp dawn a, November 7, 2023, vote thlak ni thlai dar 4 thleng silent period a ni ang.

Hemi hun chhung hian inthlan kaihhnawih thila vantlang inkhawm te, inthlan kaihhnawih thil media-a tihchhuahte phal a ni tawh lo ang.