Aizawl June 1, 2024 : Lok Sabha inthlanpuia vote tlate chu Thawhlehni hian India ram pumah a ruala chhiar a ni dawn a, vote chhiar tur hian Mizoram pawh a inpeih tawh. State dangah pawh vote thlak lova duty an awm nia sawi a ni.

ZALEN-in Election Department thawktute hnen atanga thu a dawn danin vote tlate hi zing dar 8 hian district khawpui tinah a ruala chhiar a ni dawn a. Ruahman dan chuan zing dar 8-ah postal ballot-a vote tlate chhiar hmasak a ni ang a, dar 8:30 vel atangin EVM-a vote tlate chhiar tan tum a ni a. Ruahman anga thil a kaltluan chuan chawhnu lamah chuan result kimchang puan hman beisei a ni.

Mizoram pumah counting centre 13 ruahman a ni a. Aizawl district-ah counting centre pathum a awm ang a, district dang zawngah counting centre pakhat theuh a awm ang.

Counting hall 40 a awm dawn a, heng counting hall-ah hian counting table 379 awmin vote chhiarna dawhkan tinah hian counting supervisor pakhat, counting assistant pakhat leh micro-observer pakhat zel an awm dawn a, vote chhiarna hmun hi ECI ruat observer-ten an vil dawn a ni.

Aizawlah chuan vote tlate hi hmun thum DC Office Complex, Assembly Annexe building leh Govt. Aizawl College building, Sikulpuikawnah te chhiar a ni dawn a. Assembly constituency tina vote tlate chu table hrang theuhah chhiar an ni dawn a ni.

Tun Lok Sabha inthlanah hian Aizawl DC chu Returning Officer a ni.

ZALEN zawhna chhangin Election department thawkte chuan inthlan duty-a kal police 1,047-te vote thlaktir chungchangah thuthar engmah Election Commission of India atangin dawn an la nei lo tih an sawi a. Vote thlak lova duty hi state dangah pawh an awm niin an sawi bawk.