Aizawl April 15, 2024 : Vawiin khan ZPM chuan an Party Office-ah chhung inkhawm hun an hmang a, thusawitu an party President Lalliansawta chuan, “MP inthlan lo awm turah Mizoram mipui vote nei zawng zawngte vote thlak vek turin ka sawm a, India khua leh tui kan nihna leh ringtu kan nih angin kan mawhphurhna hlen theuh hi kan bat a ni,” a ti.

ZPM President Sawta chuan, “MLA inthlanpuiah Mizoram mipui leh Pathian zarah sawrkarna kan chang a, thla 4 hnuah MP inthlan kan hmachhawn leh mai dawn a, kan tlin leh theih ngei pawh ka beisei. Kan chak lohna Minority area lamah hma kan sawn hle a, Campaign Kick-Off kan neih hnuah Campaign-a fehchhuakte atanga report kan dawn chin atangin ZPM-ah mithar 25,767 zet lawmluh an ni tawh a ni. MP inthlan hi MLA inthlanpui anga boruak sang a ni thin lova, kan phur tawk lo thiin. Chuti chung chung chuan ZPM thli a la tleh zel a, kan boruak a kang hle a ni. Candidate tha tak kan nei a, tlin pawh kan inbeisei sang hle. Viak tha leh mawngzang tawk chauh tura kum la naupang, tawnhriat nei tha leh tawng lamah pawh harsatna nei lo tur a ni a, nomination committee-in uluk taka kan ngaihtuah hnua kan thlan niin kan thlang sual lo tih kan hria a, Mizoram mipui pawhin kan thlang sualin ka ring lo,” a ti.

Lalliansawta chuan, “Mizote hi Lal nei thin kan ni a, Lal thalo hnuaiah chuan mipuite an bet tlawk tlawk a, hrehawm an ti thin. Mahse Lal ban a nih hnuah mipuiten Lal kan thlang ta a, kan thlan sual chuan hrehawm ti tur chu mipuite kan ni. Mizote kan la tlem hle a, kan tan tlan a, pheikhai rual taka kan awm theih chuan India rama vote tla percentage sang ber kan ni thei a, record siam turin ram mipuite inbuatsaih ang u,” a ti bawk.