Naktip maiah Mizoram chuan kum 5 chhunga kan ram roreltu tur kan thlang leh dawn a, sawrkar lam pawh nasa takin an inbuatsaih mai bakah tlawmngai pawl te pawhin boruak tha a awm theih nan nasa takin tan an la mek bawk a. Kan ram hruaitu tur kan thlanna turah hian mipui ten thahnemngai taka vote kan thlak vek a pawimawh hle. Sawrkar laipui chuan India khua leh tui, kum 18 tling chinte chu vote nei thei an nih avangin Electoral Roll-a an hming a chuan ngei theih nan nasa takin tan a la thin a. Kum 18 chinte Roll-a an chuan ngei theih nan political party leh tlawmngai pawlte tanpuina pawh a ngen thin a, roll-a chuang lo an awm palh ang tih hlauvin Roll ennawna pawh vawi eng emaw zat a nei thin a ni. India ram hi inthlang ram kan ni a, kum 5 danah kan ram hruaitute kan thlang thin. Chung kan thlan chhuahte chuan kan aiawhin ro an rel a, ram an kaihruai thin a ni. Mipui duhdana ram kaihruaite chuan fak an hlawh a, inthlan lehah pawh an tling leh fo a, mipui ngaihsak lote erawh hnawl an ni thin. Kan hma lawka inthlan lo awm turah pawh hian kum 5 chhunga Mizoram roreltu tur kan thlang leh dawn a, tunah hian party hrang hrangte chuan an hmachhawpte sawiin mipui hnenah an inzuar mek a ni. Hetah tak hian mipuiten rilru fim tak hmanga tu hi nge kan ram hruaitu atan tha ang tih ngaihtuah chunga thutlukna dik kan siam a pawimawh hle mai. Party ruihchilhna bansana kan ram hruaitu tur hi uluk tak leh Pathian rawn chunga kan thlanchhuah a pawimawh. Mi thenkhatten ‘ho mai mai’ tiin vote thlak loh hi an tum fo thin a, hei hi thil pawi tak a ni. Kan vote hmang hian ram kan siam tha thei a, mi dik leh tha kan thlang chhuak thei bawk a, chutiang bawkin mi thalo te hnawlna hmanrua a ni bawk. Sawrkar pawhin kum 18 tling chin, mi puitlinga a pawm vote nei thei chin chuan MLA inthlan lo awm turah hian ngaihtuahna fim tak hmang chunga vote kan thlak ngei hi kan tih tur a ni e.