India ramin inthlanpui a hmachhawn mek Lok Sabha-ah April 11, 2019 Ningani hian kan state-ah chuan vote thlak a ni dawn a, kan state hian India Parliament rorelna Lok Sabha-ah hian seat khat chauh kan neih avangin Mizoram aiawh tur kan thlang dawn a, vote thlak hi khua leh tui te tan chuan kan mawhphurhna liau liau a ni tih hriat a tul hle.
Inthlang ram kan nih angin mipui te hian rorel tur thlan hi kan kova innghat a ni tih kan chian a ngai a ; vote tur pawh ka hre lo, tih vel vang mai maia vote thlak loh ringawt hi mawhphurhna hlen zawh lohna lian tak a ni. Chhia leh tha hriatna kan nei vek a, kan aiawh tura lo dingchhuak te zinga vote tur hriat loh ringawt hi chhuanlam a tling lo, kan ram leh hnam tana tha tur duhtu kan nih chuan candidate te pawh kan theih anga anga hriat chian tum hi kan mawhphurhna leh kan tih ngei tur pawh a ni. Chung zingah chuan kan duh zawng leh tha tih zawng kan vote mai ang a, miten vote tura min tih ngawt vote lovin tha kan tih zawng kan vote kha kan tih ngei tur zawk chu a ni.
Duhthawhna vang leh thahnem ngaihna hrang hrang avangin vote thlak chungchangah ngaihdan hrang hrang te a awm thin a, vote thlak lo hial tura inngenna te pawh a lo awm tawh thin. Tun hnai mai pawh khan Tuikuk te vote thlakna tur chungchanga Election Commission hmalak dan duh lohna avangain Joint NGO chuan Lok Sabha inthlan hi boycott hial an rilruk hman a, mahse, a pawimawh zia an hriat avangin thulh leh a, kan thil lo tawn tawh ngaihtuah pawhin hei hi thil awm tak pawh a ni.
Vote kan thlak hian kan mawhphurhna pakhat kan hlen rualin Mizote hian vote kan thlak danah hian rilru puthmang fuh loh zet kan neih erawh hi chu kan sim a hun ta khawp mai. Mi tha nia kan hriat; mahse, tling zo tura kan ruat si loh vote hrehna rilru kan pu tlat thin hi a fuh lo, tling lo tura kan ngaih vote kan hreh tlatna thinlung hi paih a ngai. Tling tur kan duh kan vote hi ka thuneihna a nih rualin, ram leh hnam tana mi tha nia kan hriat kan vote hi kan tihtur zawk ni awm tak a ni. Chumi party a nih chuan vawkpui pawh ding se ka vote ang, tih tawngkam kan neih ang chi te pawh tunah chuan nuihzathlak a ni tawh a, chutihrualin, ngaihtuah chiang mang lem lo a, eng party mi emaw a nih vanga vote thlak ching erawh kan la awm tih erawh a chiang. Vote hi kan mawhphurna a nih anga kan thlak a ngai a, kan ram tan a tha tur ngaihtuah chunga vote thlak hi kan tih makmawh pawh a ni.