Gareth Bale chuan Austria nen semi-final play-off an khelh tumin goal hnih hlu tak thunin Wales chu kum 1958 hnua World Cup khel thei turin a chhawp hnai ta hle. Tun hnaia club inkhelha che ropui lem lo Bale hi he inkhelhah hian mimal takin a chetha em em a ni.

Inkhelh tan atanga minute 15-na lekah Austria lam tan Christoph Baumgartner chuan crossbar a pet per dawp a, a pet goal teuh hle. Minute 25-naah Bale a rawn inlar ta, free-kick atangin mawi takin a rawn thun a, Cardiff muala inkhel entu an phur zual. Wales captain bawk chu rawn che lehin a goal hnihna chu mawi takin mual kil sir atangin minute 52-naah a thun leh. Wales fans te an phur zual a, an ngaih a tha tel bawk. 

Marcel Sabitzer chuan minute 64-naah goal a rawn thun ve a, Austria tan beiseina thar a rawn siam. Theih tawpin an nawr let a, mahse Wales lam hi defensive a an khelh tlat tawh avangin an duh angin an che thei lo va, an si phurh an sut zo hman ta lo. 

Wales hian World Cup khel turin Scotland emaw Ukraine chak zawk zawk play-off final-ah an hmachhawn ang. Russia leh Ukraine buaina vangin Ukraine leh Scotland te inkhelh hun tur hi sawn hlat a ni a, an khelh hun tur tak tih chian a la ni thei lo. June thla hian an khelh hman beisei niin June thla tawp lamah chu play-off final pawh an khelh hman rin a ni.