DOWNLOAD OUR APP

Read latest news on your phone
app-store

Wales chuan Birmingham rawlthar Jordan James chu Nations League game khel turin a ko

Sep 20, 2022

Wales hian inhliam Joe Allen an chhawr theih dawn loh avangin rawlthar Birmingham City midfielder Jordan James chu September 22 leh 25-a Nations League-a Belgium leh Poland an hmachhawn tur a khel turin an ko.

Wales hian inhliam Joe Allen an chhawr theih dawn loh avangin rawlthar Birmingham City midfielder Jordan James chu September 22 leh 25-a Nations League-a Belgium leh Poland an hmachhawn tur a khel turin an ko.

James-a, kum 18 mi hian England Under-20 tan a khel tawh a, kar kalta khan Wales Under-21 squad-ah telh thar a ni bawk. Tunah chuan Wales senior boss Robert Page chuan a squad-ah a telh ve leh ta. 

Kaiza tha na vangin Allen a tel thei lo va, defender Ben Davies lah a ke ruh tliak vangin a tel thei lo bawk. Swansea tan khel mek Allen leh Tottenham player Davies te hi an club tan pawh an inlan thei rih lo a ni. 

Kum 29-a upa Davies hi Spurs-in Champions League-a Sporting Lisbon an hneh loh ṭumin a inhliam a, kar thum vel a chawlh a ngai ang. Swansea-in Hull chu 3-0 zeta an hneh ṭumin Allen hi a inhliam bawk. 

Wales hian nilaini hian Belgium an pan dawn a, ni thum hnuah Poland an mikhual leh dawn bawk a ni.

Spurs manager Antonio Conte chuan Wales tana khel turin Davies chu chhawr theih a nih loh tur thu a sawi chiang tawhin, Conte chuan,"Sporting Lisbon nen an inkhelh ṭumin a khup a ti hliam a, hliam nei chungin inkhelh a hmachhawn a ni," tiin Sky Sports a hrilh.

"Hliam na tak a ni hran lo va, international break zawhah chuan a rawn kir leh thei maiin ka ring. National team tan erawh a inlan hman hmel ta lo a ni," a ti. 

Kum 32 mi Allen hian June thla khan ram tana a khelh tumin a kaiza tha a ti na a, season bul pawh a ṭan theih loh phah a ni. Allen hian season liamta tawp lam khan Stoke City chhuahsanin Swansea a zawma, tunah chuan an player pawimawh ber pawl a ni phak der tawh a ni. 

Davies-a leh Allen-a te tel lo va khelh chu Wales manager Page tan pawh a harsa viauin a rinawm a, achhan pakhat chu Belgium hmachhawn tur hian an forward Gareth Bale pawh a tel thei dawn lo a ni. Anni bakah hian inhliam midfielder Aaron Ramsey leh Harry Wilson bakah goalkeeper Adam Davies te an chhawr thei dawn lo bawk. 

Wales hian November ni 21 khian World Cup-ah USA an hmachhawn dawn bawk a ni. 

James hian tun season-ah Birmingham tan match 10 a khel tawh a, a hmain Wales aiawhin Under 18 level-ah a lo khel tawh bawk. A pa, Tony-a pawh inkhel thiam niin Newport County defender thin a ni.

Share now