ZALEN September 18, 2025: Sports, culture leh awareness campain hmanga thalaite a tha lama kahhruaina kalpui thil WATO Trust chuan Aizawl-ah October 17 hian Basketball tournament an buatsaih dawn a, hetah hian Assam Rifles te chuan Mizoram Territorial Army lakna an nei dawn. October 18 zanah Rajiv Gandhi Stadium-ah hun Football exhibition match khelh a ni dawn bawk.

WATO Trust Founder leh President Dr. Yogita chuan Mihringte zalen taka nun hona neih theihna tura hmalak chu an thupui ber a nih thu a sawi a, Thalaite drugs laka an fihlim theihna turin hma an la a, Narco-Free Mizoram siam an tum, thalaite chu rilru hrisel, nun awmze nei leh kawhhmutu tha an nih theihna turin hmalak an tum thu a sawi.

Basketball tournament an buatsaih tur hi 3X3 a ni dawn a, Under 21 leh Senior-ah te neih a ni dawn a, Falkland Park-ah buatsaih tum a ni a, a rem loh chuan Dawrpui Basketball Court-ah neih a ni ang. Tel tum te chuan WATO Trust Business Strategist Asomi number 8794571126-ah registration tih theih a ni, tih man a awm lo. Lawmman tha tak siam a ni dawn bawk. He intisiakna a khel tha pathum te chu kum 1 chhung scholarship pek an ni ang.

He tournament hi Mizoram Territorial Army lakna hun atana hman a ni dawn a, Narco-Free Awareness neih a ni dawna Mizoram-ah hian drugs-free youth community din tura hmalakna neih nghal an tum bawk.

October 18, 2025 zan hian Rajiv Gandhi Stadium-ah Exhibition Match an buatsaih dawn bawk a, Infiamna leh thil hmanga mite hriat lar mi 30 ten tunah hian an tel theih tur an tichiang tawh. He inkhelah hian halftime show neih tur a ni a, tualchhung zaithiam te an che dawn a ni. Heng infiammi mi langsarte hian Ruihhlo that loh zia zirtirna hun an nei bawk ang. He hun hi Mizoram Governor General V.K. Singh hova hman a ni dawn a ni.

WATO Trust te hian Mizoram sawrkar-ah hian Sports Department, Excise & Narcotics Department leh Social Welfare Department te an thawhpui bakah Mizoram Basketball Association & Mizoram Football Association, Assam Rifles leh Sports Authority of India te an thawhpui bawk.