WBC India champion Laldingliana’n Inrinni hian WBC Asia super bantamweight title a chuh dawn a, Thawhlehni hian coach Lalmuanpuia nen Thai khawpui Bangkok an pan.

Suamlum Night Bazaar, Ratchadaphisek-ah champion lai leh Thai No. 1 Thattana Luangphon nen an inhnek dawn a, kum 24 mi Dinga’n rin hlawh lo mah se boxing a khelh tawhah inhnek lian ber a ni tih a hria a, beiseina nei chungin a fehchhuak a, a hma lam hun hril thei inhnek pawimawh em emah inlehthalna thlentir a tum dawn a ni.

2019 LPS Pro Fight bantamweight champion Dinga hi NTP Boxing Training Centre-ah ngawrh takin a inbuatsaih a. Nikum June khan Dubai-ah fehchhuak tawhin Alimzhan Tursunov nen an intawng a, a inhnekpui hian glove dik lo a bun avangin he inhnek hi awmze nei lo a nih phah a, boxrec-ah ziah luh a ni lo.

Hemi hnu hian tum hnih hruihrual chhungah lut tawhin technical knockout-in a chak ve ve. November 10 khan LPS Arena, Falkland, Aizawlah WBC India bantamweight title hnek chhuakin round khatnaah Pradish A a hneh a, professional huanga tum nga a inhnek tawhah chak vekin mi pali a knockout a ni.

Pradish a knockout hnuah WBC Asia title chuh tura a inbuatsaihna a nih thu Tuipui boxer chuan a sawi a. Manager Dr Lalmuanpuia chuan, “A hmaa a khelh thin dan aiin a nawr na a, a hnek na zawk a, a taksa tichak tura a inpuahchahnain awmzia a nei tih Pradish-a hmaah a lantir niin ka hria,” a ti.

A khelh thin dan, lehlamin amah an rawn pan nghaka hnek let thin leh vawi hnih vel hnek zawna lehlam kuah zui a chin avangin professional huangah mit a tlung tawk lo va; mahse, a inlan hnuhnun berah a khelh dan tidanglamin hriam zawkin a hmachhawn.

Pro Fight lightweight title vawi thum la tawh, Dinga coach Mampuia chuan kawng engkimah hma a sawn tih a sawi a, tun hnai maiah bantam-ah a khel a, tunah weight rit zawk, super bantam-ah inhnek dawn mah se harsatna nei lova a inlan theih ngei a ring a ni.

Kum 26 mi, Thattana chuan WBC Asia title a kawl mek humhim nan Mizo tlangval hi hman a tum a, professional boxing tum 24 a khelh tawhah tlawm nei lovin vawi 23 a chak a, knockout-in tum 15 hnehna a chang.

September 30 kha a inhnek hnuhnun ber niin Bangkok-ah unanimous decision-in Sukpraserd Ponpitak a hneh a. A hnek nat avangin Rockman tiin a hming lem an phuahsak a, world ranking-ah 69-na a nih laiin Dinga erawh 706-na a ni ve thung.