Inrinni zana WBC India super lightweight kawnghren inchuh tur, Gugan Kumar leh Vanlalawmpuia an incho tawk a. Chennai boxer-in a san zawkna a hman tangkai theih a inbeisei laiin Khuangthing tlangvalin ‘thingkung chu a sang apiang kih a nuam’ a ti ve thung.

TATA SK 612 LPS Pro Fight zan hnihna chu Inrinni zan hian LPS Arena, Falkland Vengah khelh a ni leh dawn ta a. Pro Fight title inchuhna inhnek pathum bakah WBC India super lightweight kawnghren inchuhna inhnek a awm dawn bawk.

Professional huanga mi pasrih a hnek tawha pathum hnena vawi hnih ve ve chak loh leh hnehtawk nei tawh, Gugan-a chuan, “Ka san zawk avangin hamthat neihpui turin ka khel dawn a, thil thleng tur chu kan inhnek hunah a chiang ang,” a ti.

Chennai tlangval hi August 26 khan tun tum Pro Fight semifinal-a tla ta, Omega Lalramdina nen an intawng tawh a, point hmangin a chak lo.

October 1 khan Kalaiarasan Sekar hnehin a dinhmun a siam tha a, WBC India lighweight ranking-ah 11-na ni mekin weight rit zawkah title a chuh dawn a ni.

Gugan-a’n a san zawkna a hamthatpui theih a inrin laiin Awpa chuan hei tak hi remchangah hman a tum ve thung.

“Thingkung chu a sang apiang kih a nuam. Sete Boxing Academy-ah theihtawp chhuahin chawl lovin ka inbuatsaih a, inhnek thei reng turin kan inpeih sa a, ka chak ngei ka ring,” a ti. 

Kum 26 mi, Awpa hi professional huangah vawi ruk hnehna chang tawhin vawi thum a tlawm a, vawi khat hnehtawk nei mek a ni.

Kum 2022 Pro Fight khan light champion a niin WBA Asia super light title chuhin vawi hnih Bangkok-ah a fehchhuak tawh a, Thai boxer Phoobadin Yoohanngoh-a lakah a tlawm zawn thung.

WBC India super light ranking-ah pathumna ni mekin rin hlawh zawk ni chungin a inlan dawn a ni.