Premier League-a team ropui ber zinga telh ngei tur dintu, Arsenal coach hlui, Arsene Wenger chuan October thla hian India a tlawh dawn.

FIFA Global Football Foundation chief ni mek, Wenger-a hian October chawlhkar hnihnaah India tlawhin central football academy din that dan tur leh kalpui zui dan turte a enpui dawn a ni.

Manager hriat hlawh tak hi AIFF President Kalyan Chaubey, Secretary Shaji Prabakaran ten Zirtawpni khan Australia-ah an kawm a. Hetah hian FIFA Technical Director Steven Martens leh high-performance programmes-a an hotu, Ulf Schott te an tel bawk.

An inkawmna hi FIFA leh AIFF tang dunin naupang kum 13 hnuai lamte tana central academy din dan tur chungchang sawihona a ni.

Thla rei vak lo liam taah khan AIFF hian Vision 2047 a tlangzarh a, hei hian a tum lian ber chu kum 2047-ah chuan India hi Asia khawmualpuia football ram lian pali zinga tel tura siam a ni a. Hemi tur hian a bulthut (grassroot) atanga Indian football siam rem a tel.

AIFF chuan Wenger-a puihna hian an tum tihlawhtling tura kal dan tur tha din an tum a. Academy din an tum pawh inla hrang lovin academy dang pali panga nena inthlun zawma huang zau taka kalpui a tum.

Arsenal hlawhtlinpuitu, Wenger-a nena an inkawm chungchangah AIFF President Chaubey chuan, “India-ah FIFA nena tang tlangin academy inzar pharh zau tak din turin kawng a inhawng mek zel a, Pu Arsène Wenger-a inrawlhna nen, a bul tan leh inrem dan turah min pui dawn a. A tawnhriat leh keini tumna nen, nakina kan star turte India hian a chher chhuah ngei kan beisei,” a ti.

Secretary Prabhakaran-a pawhin an thil kalpui tur leh India theihnain Wenger chu a hmina a tel vena chuan Indian football-ah rah duhawm tak a chhuah ngei a beisei thu a sawi ve bawk.

French manager thluak tha, Wenger-a hian kum 22 zet London club a enkawl chhungin hlawhtlinna tam tak chanpuiin manager zah kai ber zinga mi a ni a, kum 1996-a a lut chu kum 2018 khan a chhuahsan a ni.

Kum 1998 khan England-a ram dang manager zinga Premier League leh FA Cup la kawp thei hmasa ber a ni a. Kum 2004-a a league-a a champion-pui phei kha chuan hnehtu an tawng lo hial a. Hemi kum vek hian Nottingham Forest-in league-a inkhel vawi 42-a chak loh an neih loh chu khumin vawi 49 zet tlawm lovin a khelh zawnpui a ni.

Kum 73 mi ni tawh, Wenger-a’n India a tlawh tura a enpui tur academy hi AIFF-in Vision 2047 a neiha a bulthut atanga bul tan a tumna zinga mi a ni.