West Lungdara naupang rukbo tum nia hnamdang 3 puh an nih chungchangah Home Minister chuan Assembly House ah dan leh thupek chu mipui pungkhawm te’n tharum hmangin an lek kawhtur a nih loh thu a sawi chhuak a ni.

He thil thleng hian inhnialna a chawk chhuak leh mek a, a tirah kha chuan social media-ah a darh nasat avangin mipui an chiai a, boruak pawh a sosang hle a, rilru fim hmanna hun a han awm tan a, zawhna a rawn chhuak ta mek a ni? Mihring tawlhruk ching te hi ramri-ah an che thin zawk a ni lawm ni tih te? 2018 khan Karbi-anglong ah social media hmanfuhloh avangin naupang rukbo tum nia puh mi 2 chu chilhlum an ni a, a hnuah an ni lo tih infiah a ni leh si a ni. Tun tum pawh hian thil thlen dan (fact) inmil lo awm nia ring tlat te pawh an awm tan mek bawk a, eng pawh nise FIR a lut tawh a, police in an chhui mek a, chumi hnuah court lamin a ngaihtuah tur niin a lang a, lo nghak phawt mai ila.

Tun tum thil thlenga a lan dan hi chuan thil a chian hmain mipui lam an che hma hret em aw? tih theih a ni a, a pawi hle mai. Lirthei inhalsak hi kan ram angah chuan thil awm zen zen lo a ni a, ‘a Mizo lo’ te pawh a tih theih ang a, hnamdang tih dan kan lak a ni. Tun tum a mi lirthei halsak hi a pawi hle a, pawikhawihtute hi hi kutmanna a awm lo nia sawi a ni lehzela. Hnuchhuitu police lam tan pawh hnathawh a harsat phah a rinawma, hmangdang 3 te puh an nihna finfiahna emaw an nihlo tih finfiah na atana tangkai tur hmanrua ‘evidence’ pawi mawh tak tak te chu halchhiat vek a nih a rinawm a ni. Mipui lam hian mahni kutah thupek leh dan kenkawh sim nan i hmang ang u.

Dan leh thupek kaihhnawih thilah hian social media a thil darh phut ang chi hi rang taka thelh daih emaw sawifiahna atan chuan social media vek hi a tangkai a, a hnuah media dang hmangin chiang zawkin a sawifiah zui theih bawk a ni. Kan police te hian social media hi an hmang thiam tawh viau laiin tun thil thlengah hian an che muang deuh niin a hriat a, bengchhi renga awma rik zung zung a ngai takzet a ni.