ZALEN July 07, 2026 : WhatsApp chuan mipuite'n an phone number inhrilh tawn ngai lo a, 'username' hmanga inbiak theihna tur feature thar a tlangzarh dawn. He feature thar hi khawvel puma WhatsApp hmangtu tluklehdingawn thum (3 billion) te hman theih turin hun rei lote chhungin an tlangzarh dawn tih BBC chuan a tarlang a, India IT Ministry chuan sawrkar nena sawiho phawt a nih loh chuan tichhuak rih lo turin Meta a hriattir.

Feature thar hi tlangzarh hmain Username hi lo hauh (reserve) lawk theih a ni a, WhatsApp neitu, Meta company chuan he username hi engtik lai pawha thlak emaw, paih bo emaw theih a nih tur thu a sawi.

Username hi 'thumal' 35 aia sei lo a ni tur a ni a, phone number inpe kher loin username hmangin a inbiak theih tawh dawn a, mi langsar leh ram hruaitute hming erawh chu mi dangin an hman theih loh nan venhim a ni ang. Entirnan, mi dangin "Donald Trump" ang hming an hmang thei lo ang.

WhatsApp-a hotu Alice Newton-Rex chuan group chat-ah te hmelhriat loh laka phone number thup duh an awm thin avangin he feature thar hi an siam chhuah chhan a nih thu a sawi a. WhatsApp tharah phone number chu a lang tawh dawn lo a, mahse account siam tur chuan phone number a la ngai reng ang.

India IT Ministry chuan username hmanga inbiak theihna hian mi sual te chu phone number tilang loa mi dangte be thei turin kawng a hawn dawn a, chu chuan online inbumna hrang hrang a tipung nasa dawn niin a tarlang a ni. Sawrkar thuneitu te, sumdawnna hmun te leh mi larte hming ang deuh laa inbumna (identity spoofing) a hluar phah an hlau a ni.

India hi WhatsApp hmangtu maktaduai 850 chuang nei niin, khawvela an market lian ber a ni a, feature an tlangzarh hma hian sawrkar nena sawiho phawt a nih loh chuan tichhuak rih lo turin Meta chu a hriattir.