WhatsApp chuan thuchhuah siamin, February thla chhung khan Indian account nuai 14.26 zet chu dan an zawm loh avangin tihtawp lailawk sak an nih thu a tarlang. 

Heng account te hi WhatsApp 'term and condition' zawm lote an ni a, report an dawn atanga an tihtawp sakte an ni. India rama  phone number te hi a tirah +91 a awm thin a, chuta tang chuan Indian account a nih leh nih loh rang takin an hre thei. Report an dawnte hi zirchian an nih hnuah hma an la thin a, account neitu eng emaw zat chuan an khinglet ve bawk. Heti chung hian February thla chhung ringawt khan Indian account 14.26 zet chu 'ban' a ni. 

Company lam hian khawvel hmun hrang hrang atangin complaint an dawng hnem hle ang tih a rinawm a, chung zingah chuan India mi an thahnem hle tihna a ni. WhatsApp-in February thla chhung ringawta account a 'ban' zat hi khawvel pumah maktaduai 1.4 zet a tling - khawvel huap ang pawhin social media hmang dik lo fe fe chu kan tam tih a chiang!