Carlos Alcaraz chuan tun hnai kum eng emaw zat chhung Novak Djokovic-a’n Wimbledon mipa maltan a thunun chu titawpin champion thar a ni ta a. All England Club-a chak ber a nih chiaha lawmpui hmasatu zinga mi chu Rafael Nadal a ni.

Spainish tlangval kum 20 mi, Alcaraz-a hian Pathianni zana Centre Court final-ah hian champion lai chu harsa takin 1-6 7-6 (8-6) 6-1 3-6 6-4 in a hneh.

Lawmpuitu tam tak a nei nghal a, heng zinga langsar ber pakhat chu a naupan lai atanga a entawn leh a idol Nadal a ni a, Twitter-ah a lawmpuizia a tar lang.

“Congratulations @carlosalcaraz. Vawiin hian hlimna ropui tak min thlen a, Spanish tennis-a kanhmahruaitu, Manolo Santana pawh a awmhmunah a hlim ve tak zet ngei ang,” a ti.

Spanish tawngin, “A very strong hug and enjoy the moment, Champion!!!” tiin champion thar thlalak nen a dah chhuak a ni.

Nadal-a hi kum tira Australian Open 2nd round-a a chak loh tuma a inhliam hnuah kuminah a la inkhel leh miah lo va. April thlaa French Open-a Djokovic a champion-a mipa maltana Grand Slam nomawi la hnem ber a nih chiah pawh khan a lawmpui hmasa bertu zingah a lo tel tawh a ni.

Nadal hnungzuitu
Pathianni zana Wimbledon final khelh hma, kar liam ta chhovah khan Spain-ah chuan Alcaraz-a kum 13 mi lek a nih laia an kawmna chu a lar thar hle a. Heta an kawmnaah hian, “Rafa Nadal ang nih hi ka duh a ni,” tiin a sawi a. Tunah chuan a duh ang chu a hlawhtling ta.

Nadal-a kha Wimbledon final a luh hmasak ber khan kum 20 mi ve bawk a ni a, a hnungzuitu Alcaraz-a pawh hetiang kumah chiah bawk a vawi khat nan final a khel ve.

“Rafa ang hi nih ka duh. A inzir nasain a bei nasa a, inpumpekna nen a hlan tam em em a ni,” tiin mipa naupang a nih laia an kawmnaah hian champion thar hian a sawi.

Wimbledon-a Nadal-a a inlan hmasak ber lai hian Alcaraz-a hi kum khat chauh a la ni a. Tun thlengin Spanish veteran hi vawi hnih a champion tawh a, Alcaraz-a hian tennis a khelh ve tawh chhung zawngin a entawn a, amah titangtu ber a ni.

Duhthusam hlawhtling
A hnampui leh a idol ang nih tuma bei tang tang thin, Alcaraz-a chuan a duhthusam leh a lo suangtuah thin a tipuitling ta a, Nadal-a angin Wimbledon champion a ni ve ta.

“Ka tan chuan duhthusam hlawhtlinna dik tak a ni,” tiin nomawi an hlan zawha an kawmnaah a sawi reng a ni.

“Lo chak lo ta pawh ni ila, kei chu inchhuang takin ka awm tho vang. Hetiang hmuna tun ang dinhmun hi naupang kum 20 mi tan chuan a thleng rang lutuk tawh sa hrim hrim a ni,” tiin Djokovic-a lakah tlawm pawh ni se a lawm tho tur thu a sawi.

Kumin final-ah khan Djokovic-a hi chak sela a zawna vawi nga a champion-na tur a ni dawn a, a vaia vawi riat champion-na tur leh Grand Slam nomawi lak tam lama a sang ber a nih rualna tur a ni bawk.

Kum 36 mi, Serb hian rinkai ber, Alcaraz-a a ngam ta lo thung a, set khatna laksak nghal mah se set hnihna leh thumna a hloh va, set lina laksak leh mah se a tawpah a dingchang zo ta chuang lo va; Spanish tlangvalin a vawi hnih nan Grand Slam nomawi a la ta a ni.

Alcaraz-a hi nikum US Open-ah championin a vawi khat nan Grand Slam nomawi a la a. London-a a champion chiah hian chhuatah a hmai lei siin a bawkkhup a, a lawm tak zet tih a hriat.

Centre Court-a an inkhel hi Prince & Princess of Wales bakah lemchan thiam, Brad Pitt leh vawi hnih champion lo ni tawh, Andy Murray te pawhin a hmunah an en a ni.

Juan Carlos Ferrero-a kaihhruaina hnuaia inkhel, Alcaraz-a hi Open era china Wimbledon mipa maltana champion thei naupang ber pathumna a ni thar ta a.  Kum 17 mi lek niin kum 1985 khan Boris Becker-a a lo champion tawh a, a hmain kum 1976 khan kum 20 mi bawk niin Bjorn Borg a champion tawh bawk.