GRAPE RAH LEI DAN

Khua            Kum    Lei zat (qntls)
Champhai    2020    1,140
                    2021    1,50
Hnahlan       2020    500
                    2021    637

Champhai Grape Growers' Society hi kum 2007 a din a ni.

Hnahlanah kum 2004 chho atangin hma an la tan a, kum 2015 ah Hnahlan Grape Growers' & Processing Cooperative Society an din. 

Aizawl : MLP Rules Drafting Study Committee in MLP Rules ah wine siam phalna telh loh nise tia an rel mek laiin, tun dinhmunah Champhai leh Hnahlan winery ah grape tui sawrsa, grape wine a siam tur litre nuai 2 chuang a awm mek a, Champhai leh Hnahlan a grape chingtute mangang takin an awm mek nia thudawn a ni.

Champhai leh Hnahlan Grape Growers' Society hruaitute chuan MLP Rules ah wine siam phalna telh a nih loh chuan an tan chem lova lu lakna a ni thei hial dawn tih ZALEN an hrilh a, Council of Ministers thutlukna siam turah beiseina sang tak an la neih thu leh chumi a zira hmalakna kalpui zel an tum thu an sawi.

Champhai Grape Growers' Society hruaitute sawi danin, an society ah member 140 vel an awm mek a, chung mite tharchhuah grape rah chu kg ah Rs. 50 zelin nikum chhung khan quintals 1,050 an lei sak a, kum 2020 khan quintal 1,140 an lo lei sak tawh bawk.

Tun dinhmunah Champhai winery ah grape tui sawr sa litre 2,20,000 bawr vel a awm mek bakah, hralh theih mai tura siam sa wine case 3,016 a awm mek.

Hnahlan Grape Growers' & Processing Cooperative Society ah pawh member 250 vel awm mek bawkin, nikum khan kg ah Rs. 50 in quintal 500 vel grape rah an lei a, kum 2020 khan quintal 637 an lo leisak tawh bawk. An hruaitute chuan MLP Rules a wine siam phalna telh chungchangah tunkar chho hian Chief Minister hmuh an tum dawn niin ZALEN an hrilh.

Kuthnathawk grape chingtute tharchhuah grape rah te chu wine a siam a nih loh chuan a market ah harsatna hrang hrang a tam tih Grape Growers' Society hruaitute chuan sawiin, kuthnathawktute dinhmun hrethiama wine siam phalna MLP Rules a telh ngei chu an duhthusam a nih thu an sawi.