ZALEN, November 02, 2025: Women’s U-19 T20 Trophy 2025-26 khelh mekah Mizo tleirawlte chuan Pathianni khan wicket ruka Megalaya hneh lehin Plate-ah final an lut a, Thawhlehni hian Manipur nen nomawi an inchuh dawn a, an chak chuan season tharah Elite-ah an khel thei dawn.

Mizoram hian Board of Control for Cricket in India (BCCI) buatsaih inelnaah hian khelh ngaah point 14 hmuin pahnihna an ni a. Vawi thum hnehna changin vawi khat an tlawm a, net run rate-ah phei chuan an group-a team paruk zinga a sang ber (2.372) an ni a.

A vawi khat nana BCCI buatsaih inelnaa final an luhna kawngah hian Meghalaya bakah Nagaland leh Sikkim an hneh a. Arunachal Pradesh nen ruah vanga inkhel thei lovin result awm lo (no result) an nei a, Manipur lakah an tlawm thung.

Manipur nen hian Lucknow, Uttar Pradesh-a Bharat Ratna Shri Atal Bihari Vajpayee Ekana Cricket Stadium-ah final hi an khel dawn a. Thenawm state hi Nilaini mai khan wicket nga an hneh lo tawh a, final-ah hian phuba laka inelna sang zawka season thara inlan phak ngei an tum hle.

Pathiannia Meghalaya nen an inkhelhah hian Mizoram hi thum vawrah chakin vawm hmasak an thlang a, an bowler-te an che tha zui hle.

Over 20 chhungin an tumpuite hian run 50 chiah siamin mi pakua an thi hman a. R Basumatry-i chu run siam tam ber niin 18 a vaw chhuak a, a thiante zinga pali chu run siam miah lova vawm hlum an ni.

Mizo bowler zingah Sandhia Rai chuan over li a vawmah run nga chiah pein pahnih a vawm hlum a, Zothanmawii Rokhumin pahnih a vawm hlum ve bawk.

An umphak tur sang lo tak an umnaah Mizo batter-ten bul tan tha tawk lo mah se Player of the Match atana thlan zui, Kawnpui tleirawl, Sandhia-i (run 13) leh Lalrindiki (run 11) chu a tawp thlenga dam zuiin over 12.4 lekah an umpha a, wicket rukin hnehna an chang a ni.

INKHEL KHAIKHAWMNA

Meghalaya 50/9 (20 overs)

Sandhia Rai - 2/5 (4 overs)

Zothanmawii Rokhum - 2/12 (4 overs)

Mizoram 51/4 (12.4 overs)

Sandhia Rai - 13* (17)

Lalrindiki Ralte - 11* (9)

Wicket rukin Mizoram an chak.