Olympic leh world champion javelin thrower Neeraj Chopra chu Men’s World Athlete of the Year award dawng thei tur mi 11 chhawp chhuah zingah a tel.

Chawimawina sang dawng thei tura chhawp chhuahte hi athletics lama mi thiam, khawvel huapten an thlan a ni a. A thlangtute zingah hian World Athletics-a tel khawmualpui paruka mite an tel a ni.

Award dawng tura chhawp chhuahte hi Budapest-a World Athletics Championships-a an chet dan te, one-day meeting circuits te, Label road races leh khawvel hmun hrang hranga inelna huaihawta an dinhmun atanga an teha a tlingte an ni.

Chopra ruala chhawp chhuah dangte hi shot putter Ryan Crouser, US; pole vaulter Mondo Duplantis, Sweden; 3000m steeplechaser Soufiane El Bakkali, Morocco; Jakob Ingebrigtsen, Norway; 1500m/5000m, marathoner Kelvin Kiptum, Kenya; decathlete Pierce LePage, Canada; sprinter Noah Lyles, US; race walker Alvaro Martin, Spain; long jumper Miltiadis Tentoglou, Greece leh 400m hurdler Karsten Warholm, Norway te an ni.

Chawimawina dawngtu tur hi chi thuma vote thlak atangin lak a ni ang a, mi panga thlan chhuah leh phawt tur an ni.

World Athletics Council leh World Athletics Family chuan email hmangin vote an thlak ang a, mipuiten online hmang thovin World Athletics social media platform hrang hrangah tha an tih an thlang thei dawn bawk.

Infiam mi 11-te thlalak hi Facebook, X, Instagram leh YouTube-ah chhawp chhuah a ni thuai dawn a. Facebook, Instagram leh YouTube-a like leh X-a retweet chhawn chu vote zelah chhiar a ni ang.

Vote thla hi a hlut dan a inang dawn lo va, World Athletics Council-in vote 50% changin World Athletics Family leh mipui vote chu 25% ve ve a ni thung ang.

World Athletes of the Year chawimawina dawng tur thlanna atan hian October 28 zan lai thleng hun hawn a ni dawn a. Chuta vote hmu tam mi pangate chu World Athletics-in November 13 leh 14-ah a puang ang.

A tawpa dawng tur chu World Athletics-in an social media platform-ah December 11 hian an puang dawn a ni.