Aizawl; Mizoram police-ten tun hnai, 2018-23 chhungin ruihhlo man leh dan phal loh ramsa (smuggled exotic wildlife) tawlhruk tam tham tak man leh hal ral an nei a, chungte chu ‘World Book of Records’-ah a lang.

Home department-in tun hnaia achievefment report (2008-2023) an tihchhuaha tar lan a nih danin June 24, 2023 khan dan phal loh ruihhlo chi hrang hrang an man khawm, kg 930.229 zeta rit, international market-a Rs. 23,62,09,40,245 man hu zet chu an hal ral a, hei hi World Book of Records-ah a lang.

Hemi baka World Book of Records-a lang pakhat chu dan phal loh ramsa tawlhruk man chungchangah niin May 9, 2022 khan Khankawn police check gate, Champhai district-ah ramsa chi hrang hrang 468 zet an man a ni.

Heng tum khata ramsa chi hrang hrang an mante hi tortoise pali, snake 11, lizard 442, toed sloth pali, beaver pahnih, wild cat pakhat leh potto pakhat te a ni.

Mizoram police-te hian kum 2021 khan ramsa tawlhruk chi hrang hrang 194 man an nei a, chungte Hmawngkhawthlir, Khuangpuilam, Kolasib-a man niin kum 2022-ah ramsa chi hrang hrang 663 man nei bawkin, chungte chu Khankawn police checkgate Champhai police checkgate, Vairengte Saiphai police check gate, Tuisenphai police check gate, Khawzawl, Champhai, Saiphai police outpost leh Kanhmuna an man te an ni.

Kumin 2023 chhungin ramsa chi hrang hrang 17 man nei leh tawh bawkin chungte chu Talpui Junction, Khawzawla man an ni a. Police-te hian heng dan phal loh ramsa tawlhruk an mante hi forest department leh custom preventive force te kutah a vaiin an hlan vek a ni.