Aizawl: Nimin June 3, 2017 kha khawvel puma ke lek ni ‘World clubfoot day’ a ni a, he ni hi Millennium Centre tualzawlah hman a ni. World Clubfoot day hmannaa khuallian Parliamentary Secretary (Education) Joseph Lalhimpuia chuan Clubfoot Mizoram ten mahni insengsoa mi dangte tana hun leh tha an hmang thin chu ropui a tih thu sawiin, “Mahni insengso a mi dangte tanpui hi Pathian duh dan a nih bakah hna zahawm leh malsawmna a ni,” a ti a. An hnathawh avanga midang ten damna an chang chu a lawmawm hle a ni tiin, “Mi dangte tan engtin nge kan tangkai ve theih ang tih hi i ngaihtuah fo thin ang u,” a ti bawk. Clubfoot Mizoram Chairman Zohmingthangi Sailo chuan CCFM ten kum 5 chhung mi dangte tanpui nan hun an hmang tawh nia sawiin anmahni vangin naupang ke lek 57-in damna an chang tawh tih a sawi a. A mamawh apiangte tan kartin Ningani apiangin Aizawl leh Lunglei Civil Hospital-ah te inentirna hawn thin a ni tiin mipuiten hmang tangkai se a duh tih a sawi bawk. Dr. Lalnghakliana pawhin thu sawiin ke lek chu enkawl hma chuan a dam hma tih sawiin an pian atanga kum 7 an nih thlengin enkawl dam theih an ni tih a sawi a. Tunhma chuan enkawl dam nan zai (operation) tih thin a ni a; mahse, tunah chuan enkawl damna a awm tawh niin a sawi bawk. Kumin World Clubfoot day thupui atan hian ‘Ke lek vanga piansualna i tibo ang u’ (end disability from club foot) tih chu hman a ni.