World Cup 2022: Hmatiangah kan thlir
![](/storage/news/post/oIoZC1k88IsHQtISgv4j8ueQu7655Kg3KgexCbH0.jpg)
Mizo-te game ngainat ber football World Cup chu kumin kum tawp hian Qatar ramah khelh a ni dawn. He football khawmpui lianah hian khawmualpui hrang hrang atanga football thiam ram 32 te an inel dawn a ni. 2020 European Championship Champion Italy tel phak lohna tournament hi a nep thei lo.
Kum dangah chuan world Cup hi nipui lai June leh July bawra khelh a ni thin a, mahse kumin erawh kum tawp lam November leh December thlaah te khelh a ni dawn thung. Hetia khelh hun an sawn chhan hi a thlengtu ram Qatar hi nipui laia a lum lutuk vang a ni ber. World Cup khelh lai hian 2022/23 Premier League season kal lai pawh kum danga an tih loh ang takin thlasik chawlh an nei hma ang. Hetia an chawlh hma nachhan chu an player ten World Cup khelh nan chawlh hahdamna hun thawl zawk an neih na tura tih a ni.
World Cup 2022 khelh hun tur chu
World Cup qualifying hi tun thla chhunga zo tura beisei a ni. Chuti a nih chuan World Cup group stage draw hi April ni 1 a neih hman tura ruahmanna siam a ni (Russia-in Ukraine an run avangin ram pathum te erawh chuan March thlaah qualifying an khel zo ve hman dawn lo) Tournament hi November 21 (Thawhtanni) ah kick off neih tura ruahman a ni a, a thlengtu ram Qatar chu match hmasa berah an inlan dawn a, an tumpui tur team pawh a hriat thuai ang.
Opening match hi entu mipui 60,000 lenna Al Bayt Stadium-ah an khelh a ni ang. Group stage hi December ni 2, Zirtawpni thleng khelh a ni ang a, a tuk December ni 3, Inrinni atangin knock-out khelh chhunzawm nghal a ni ang. Final chu entu mipui 80,000 lenna Lusail Iconic Stadium-ah December ni 18, Pathianni-ah khelh a ni ang.
Tihdan phung pangai angin World Cup 2022-ah hian thlengtu ram Qatar tiamin ram 32 an tel leh ang. Euro 2020 ang lo deuhin team 32 te hi group 8-ah then hran an ni ang a, group tina a sang pahnih group winners leh runners-up ten stage sang zawk lutin round of 16 an khel ang a, knockout stage ni tawhin final thlengin a chak apiang an ding chang chho zel tawh ang. December ni 17, Inrinni-ah pathumna zawngin Khalifa International Stadium-ah khelh a ni ang.
World Cup 2022: Khawi hmunah te nge an khelh dawn
Tournament hi a thlengtu ram Qatar a nih angin inkhelh tam ber chu an ram khawpui Doha-ah khelh a ni ang. Doha bul hnai Ras Abu Aboud Stadium, the Al Thumama Stadium, Education City Stadium leh Khalifa International Stadium-ah te khelh a ni ang. Tournament hi hmun dang pali Lusail khawpui, Lusail Iconic Stadium-ah leh Al Khor khawpui, Al Bayt Stadium-ah te khelh a ni bawk ang a, Ahmed bin Ali Stadium leh Al Janoub Stadium-ah te khelh a ni bawk ang. He tournament khelhna tur stadium te hi hmun a inhnaih hlawm hle a, stadium inhlat ber pawh Al Bayt Stadium leh Al Janoub Stadium niin km 65 chauha inhlat a ni.
World Cup 2022: Sik leh sa bakah khelh hun tur
Khawlumna hmun Gulf ram Qatar-a khelh tur a ni a, hei vang hian mi thenkhat chuan an sawisel phah nghe nnghe. Qatar hi November thlaah a tlangpuiin khaw lum zawng temperature hi 22C leh 30C inkar a ni thin a, December thlaah erawh vawt hretin 17C leh 25C inkar a ni thin. Ram vawt a cheng thin tan chuan tawrh fe tham chu a la ni tho maithei. Nipui lai May leh August thla vel chuan temperature hi 37C te a pel thin. Qatar sana hi India sana aiin darkar 2:30 in a tlai hret zawk.
Final hi Qatar rama tlai dar 6-ah kick off neih tur a ni a, keini ramah chuan zan dar 8:30 velah kan lo thlir thei ang. A tlangpuiin game hi kan ram sana tlai dar 5:30 leh zan dar 9:30 velah te khelh tan a ni tlangpui ang.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024