DOWNLOAD OUR APP

Read latest news on your phone
app-store

World Cup 2022 thleng tura Qatar kan thlang kha kan tisual: Sepp Blatter

Nov 09, 2022

Fifa president hlui Sepp Blatter chuan 2022 World Cup thleng tura Qatar an thlang chu an tihsual lian tak niin a sawi a, thutlukna diklo siamah a inngai. 

Fifa president hlui Sepp Blatter chuan 2022 World Cup thleng tura Qatar an thlang chu an tihsual lian tak niin a sawi a, thutlukna diklo siamah a inngai. 

Kum 86 mi Blatter hi kum 2010-a World Cup thleng tura Qatar an thlan lai khan Fifa president a ni a, kha tihlaia an thutlukna siam kha a fuh taklo tih Swiss hian BBC Radio 5 Live podcast-ah a sawi chhuak a ni. 

Tun hnaiah Qatar ram inrelbawl dan leh World Cup laia mipui khuahkhirh an tum danah sawisel an hlawh chho mek. Gulf state hian mahni anpui kawp an khap tlat a, mihringin an dikna chanvo an chang phak lo deuh niah an ngai bakah ram dang atanga hnathawk te chunga an chet danah sawisel an hlawh nasa hle bawk. 
   
Swiss chanchinbu Tages Anzeiger-in an kawmnaah pawh Blatter chuan,"Football khawmpui lian World Cup-te ang thleng tur chuan Qatar hi chu a te mah mah deuh a ni," a ti. 

Fifa executive committee chuan kum 12 kalta khan World Cup thlen dil ram pahnih United States leh Qatar te bukin Qatar hi an thlang ta zawk a ni. 
Hemi tum pawh hian Blatter chuan United States zawk a vote thu a sawi a, khatih laia Uefa president Michel Platini kha Qatar duhtu langsar a ni thung. 

Blatter chuan,"Qatar kan thlang kha thil tha lo tak a ni. President nimah ila manhni duh dan angin thil a kalpui ngawt theih bik si lo va, mah se khatih laia president ka nih miau vangin mawhphurhtu chu ka ni. Platini leh Uefa hruaitu dang pali te vote vangin World Cup hi United States thlang lovin Qatar kan thlan phah a ni," a ti. 

Qatar hi Middle East ram zinga World Cup thleng hmasa ber tur an ni a, Northern Hemisphere thlasik laia an khelh vawi khatna tur ni bawkin tun thla November ni 20 atanga December ni 18 thleng khelh tur a ni. 

Share now