Ram paruk. Time zone panga. Khawmualpui pathum. Nipui leh thlasik. World Cup pakhat.

Kum 2030 tournament - South America, Africa leh Europe khawmualpuia nghah rual vek tur hi a taka a nih dan tur thlirlawk thiam harsa tak a ni.

Fifa World Cup 2030 hi khawmualpui pakhat aia tama khelh hmasak ber a ni dawn a, kum 2002 khan ram pahnih, inthenawm, South Korea leh Japan chuan an lo inthlen tawm tawh thung.

Kum 2026-ah hian ram pathum - USA, Mexico leh Canada ten an inthlen tawm dawn a; mahse, 2030 World Cup erawh a dang hlawk dawn.

Spain, Portugal leh Morocco ramte chu inthlen tawm tur an ni a; mahse, a hawnna inkhel pathum chu Uruguay, Argentina leh Paraguay-ah World Cup kum 100-na pualin khelh a ni dawn.

Eng ang takin nge kalpui a nih dawn? Player leh fan-te tan thil buaithlak a ni dawn em?

Ram pakhat tan ram 48 telna World Cup a rit lutuk em?

Uruguay, Paraguay leh Argentina ramte hian Montevideo khawpuia tournament khelh hmasak ber atanga kum 100-na pualin inkhel hmasa pathuma pakhat theuh an thleng dawn.

Uruguayan khawpui hi 2030 World Cup inkhel hmasa ber thlengtu tur a ni dawn a, Argentina leh Paraguay ramten dawtin a bak zawnga ram 48-te inelna inkhel hi Africa hmar lam leh Europe-ah nghah a ni thung ang.

A inkhel hmasa pathum a zawh hnuah hi chuan 2026 World Cup-a mi tur ang bawkin, ram pathumah khelh a ni dawn tihna a ni.

Kum 2026 atang hian World Cup-ah hian ram 48 telh an ni tawh dawn a. US, Mexico leh Canada-ah hian khawpui 16-ah inkhelh nghah a ni dawn.

Fifa hian group khata team li zel awm hi a la kalpui a nih chuan inkhel vawi 80 awm thin kha 104 a ni tawh dawn a, Round of 32 stage a awm thar bawk ang.

World Cup vawi 22 awm tawha vawi khat tih loh chu ram pakhat zelin an thleng a. A tel thei ram tihpun zel a ni a, tunah chuan inthlen tawm ang chi hi a tam zel dawn niin a ngaih theih a, chutiang tura thlen dil pawh an pung bawk.

Nipui leh thlasikah

Khawvel vâng tana chhim leh hmarah inkhel a awm dawn avangin World Cup pakhat ni siin nipui leh thlasikah player thenkhat chu an khelh a ngai dawn.

South America-a a hawnna inkhel pathuma inlante chu a bak zawng khawvel hmar lam, Europe-ah emaw, Africa hmar lamah emaw an khelh zawm a ngaih dawn avangin thlasika inkhel kha nipuiah an chhunzawm a ngai dawn tihna a ni.

June-ah hian Uruguay-ah chuan boruak a vawt viau a, a tlangpuiin 8 leh 15°C inkar, thlasik hun lai a ni a. Hetih lai vel chiah hian Morocco-ah erawh 30°C chung lam a ni reng thung.

Uruguay leh Argentina hi June-ah chuan an khaw awm dan a inang vel a, an hmar lam hret, Paraguay-ah erawh lum hretin chawhrualin 23°C vel a ni.

Paraguay pawh hi lum deuh angin lang mah se Spain leh Portugal nipui lum vanglai lakah chuan vawt tak a la ni a, Morocco, ang bawk niin July thla bawrah phei chuan 35°C chung lam a ni fo.

Veivahna, khelh hun leh environment buaina

Kum 2030 daih tur a la nih avangin inkhelh hun turte kimchangin puan a la ni lo va; mahse, thil chiang tak chu tute pawhin zin veivahna atan sum leh hun an seng tam sawt dawn.

Inkhelh nghahna tur khawpuite puan a la nih hunah thil a chiang lehzual dawn a, engpawh ni se, khawmualpui leh ram dang zinpawh sek tur chuan hun leh sum chu a hek dawn hrim hrim.

A hmuna awm ve lo, mahni in lum atanga en tur tan pawh thil a buaithlak tho tho dawn. Paraguay leh Spain te phei chu darkar nga vel laia an sana inthlau a ni a, a buaithlak dawn tih a chiang.

South America-a a tir lam khelh a ni dawn a, Argentina leh Spain inkar hi darkar 13 vel thlawk a ni a, a hautak dawn hle.

Qatar 2022-ah khan zin veivahnaah carbon tihchhuah tam a nih avangin khualrel humhim duhtu pawlte chuan Fifa hnenah pawh an zualko nghe nghe tawh.

2026 World Cup-ah hian Fifa chuan zin veivahna atangin £ maktaduai 521 vel hlep theih a ni dawn niin an chhut lawk a; mahse, tournament an huaihawt tawha boruak him lo an tihchhuah nasat ber tum a ni dawn thung.

Fifa hian sik leh sa inthlak nasa chu khawvelin a buaipui a ni tih an hriat ve tho avangin a tichhe lehzual thei tur ang chu a theih chen chena ven an tum tih an sawi.