Mason Greenwood chu kar nga chhung hren ni tawhin court-a inlan tura an tih ni tak chu World Cup-a England-in Qatar-a Iran an hmachhawn ni tur chiah a ni. 

Kum 21 mi hi Zirtawpni khan pawngsual tuma puhna leh nungchang mawilo vangin thubuai siamsak a nih hnuah Thawhlehni khan hren a ni. Manchester Magistrate Court-ah inlanin District Judge Mark Hadfield chuan footballer hi court-a a kir leh hma chu kar nga chhung lung inah a khung rih dawn a ni. 

Manchester United striker hrem mek hi January thla aṭang khan bail-a chhuah lailawk tir a ni a, thubuai ngaihtuah hun sawn a nih hma hian nimin zing khan a hming, a pian ni leh address-te tichiang tura koh a ni a, hemi ni hian Nike tracksuit dum a ha a, hearing neih ni hian a inzuah bawrchhawr hle niin an sawi. 

Judge Hadfield-a thutlukna siamah chuan Greenwood hi November ni 21-ah Manchester Crown Court-ah a inlan dawn a, chu chu Three Lions-in World Cup an khelh ṭan ni tur chiah niin Group B match-ah Gareth Southgate-a ho ten Iran an hmachhawn dawn a ni.

Three Lions head coach hian hun harsa tak a tawng chho mek a, a squad tur pawh a la rem fel hlei thei rih lo. Nations League an khelh chhiat em vangin group stage atangin an tla a, chutih rualin Southgate hian World Cup lak pui ngei a tumruh hle thung.