Qatar World Cup chu khawvel footballer piang tawh zinga player ropui ber an sawi changa an hming ri ve ziah thin pahnih Portugal captain Cristiano Ronaldo leh Argentina captain Lionel Messi te World Cup khelh hnuhnung ber tur a nih hmel a, boruak pawh an ngah dun hle a ni. 

Ronaldo chuan mual chhung leh chawimawina dawhsana a elpui ber Lionel Messi chu 2022 Qatar World Cup final-a a hmachhawn chak thu a sawi mauh mai. Qatar-ah match khat ve ve an khel tawh a, goal an khung ve ve tawh bawk. Chutihrualin, Ronaldo'n a team te a chakpui theih laiin Messi leh a pawl te erawh an tlawm thung.

Kumin World Cup-ah hian Ronaldo te ram Portugal hi champion tura beisei ram zingah an lang phak lo, Group H-ah awmin Ghana , Uruguay leh South Korea te nen an awm ho. Lionel Messi-a team Argentina erawh expert thahnem takin champion thei tura an sawi zing a mi an ni thung a, anni hi Group C-ah awmin Saudi Arabia, Mexico leh Poland te nen an awm ho.

Khawvel footballer zinga fans ngah ber pahnih te world cup hnuhnug ber turah hian Messi leh Ronaldo te hi final-ah  inhmachhawn se tih chu duhthusam a ni ngei ang. Ronaldo chuan final-a Messi hmachhawn a chak thu sawiin,"World Cup final-a Messi hmachhawn chu ka duhthusam a ni, Messi hi player ropui tak a ni, a thiam dan a danglamin mibik a ni. Messi nen hian kan inkar a tha a, kum 16 chuang zet chu kan khel ho ve tawh. Ka inleng leh thian hnai zualah chuan a tel hauh lo naa ka team-mate ang maia ka ngaih a ni," a ti. 

Sawi zawmin,”Amah hi ka zah a, ani pawhin ka chungchangah rilru chhia a puin ka ring lo. Football tana thil ropui thlentu chu amah Messi hi a ni, tiin a elpui Messi chungchang a sawi.