Manchester United goalkeeper David de Gea chu Spain national team head coach Luis Enrique-a’n Qatar World Cup 2022 khel tur preliminary squad mi 55 a thlan chhuah zingah a tel ve loh vangin World Cup lamah chuan a hmel hmuh tur a awm dawn lo a ni. 

David De Gea hi tunah Manchester United number one goal keeper la niin a la rin tlak hle chunga thlan chhuah zinga a tel phak lo hian mi mak tih pawh a hlawh hle a ni. World Cup squad-a a tel phak loh hian nakin zela Old Trafford lama a dinhmun pawh a nghawng phak maithei a ni.  

Spain tana World Cup-a inlan tur preliminary squad FIFA lama theh luh goalkeeper panga zingah De Gea hming a lang tlat lo. United lamin keeper rinrawl bera an neih David de Gea hian season bul atangin tun thlengin goal a la veng a, tun season-ah game 16 a khel tawh a ni. 

De Gea hi October 2020 hnu lamah Spain tan a la inlan leh lo va, chuti pawh nise preliminary squad em pawh a a lang phak lo hi chu thil mak a tling a ni. Ram tana De Gea thlan a nih loh laiin Premier League goalkeeper mi eng emaw zat chu thlan an ni leh lawi a. 

Daily Mail sawi dan chuan,"Manchester United keeper David de Gea chu mi 55 awmna provisional squad list-ah a lan loh vangin kumin kum tawpa khelh tur Qatar World Cup-ah a hmel hmuh tur a awm dawn lo. Spanish boss Luis Enrique hian tournament khel tur mi 26 a thlang chhuak leh dawn a ni. 

Qatar lama thlawk lut tur goalkeeper thlan chhuah pathum an awm a, chung te chu;  Athletic Bilbao's Unai Simón, Brighton's Robert Sánchez and Brentford's David Raya te an ni. 

Thla vengah Chelsea keeper Kepa Arrizabalaga leh Getafe a khel David Soria te an awm bawk ang.