October 15 khan a club hlui Everton si hnih faia an hneh tumin Richarlison chu inhliam vangin second half-ah thlak a ngai a, a inhliam chungchangah Tottenham boss Antonio Conte chuan Brazil forward Richarlison chu a ke ruh hliam entir a nih hnuah World Cup khel tura a dam hman a beisei thu a sawi. 

Spurs-in Everton an hneh ṭumin kum 25 mi hian minute 52-naah hliam a tuar a, thlak a ni. Vanneihthlak takin a hliam na lo hlauh a, Conte chuan,"Kan player hi a hliam na lutuk lo va, World Cup chu a khel thei ngeiin ka ring. A inhliam a, mahse hliam na tak erawh a ni lo. World Cup hmain Spurs tan pawh game a khelh leh hman ka beisei," a ti.

Richarlison chuan Twitter lamah,"Thiante u, Pathian hnenah lawmthu awm rawh se, hlauhna lian tak ka nei hman a, mahse kar hnih hnuah ka rawn kir leh ang thei ang. Min tawrhpuina leh min hmangaihna thu thawn te avangin lawmthu ka sawi e," a ti. 

Brazil hian November thla tir lamah an World Cup squad hming an tar chhuak dawn a, Qatar-ah hian November 24-ah Serbia nen an match hmasa ber an khel ang. 

Inrinni zana Manchester United an hmachhawn hunah erawh a inlan thei dawn lo a ni. Richarlison hi July thla khan  Everton aṭanga pound maktaduai 60-in an lei chhuak a, Tottenham tan match 13-ah goal hnih a khung tawh.