ZALEN, July 18, 2026: Fifa World Cup 2026 chu Pathianni zanah a zo dawn a, ram dangte ang bawkin Mizoram pawhin a buaipui a. Sikul tam tak chuan zirlai leh nu leh paten a tuk sikul kal ngai lo tih hriaa hahdama taka final an en theih nan a tuk chawlh an puang hlawm.

ZALEN-in sikul hrang hrangten an zirlai leh nu leh pate hnena chawlh an puan hriattirna a hmuhah chhungkuain hlim leh hahdam taka World Cup final an en tlan theih nan World Cup Holiday atan Thawhtanni an puan thu an tar lang hlawm.

Mi mal sikul hriat hlawh tak, Lalmalsawma Memorial School (LMS), Khatla, Aizawl chuan ‘LMS family-ten World Cup final nuam leh hahdam taka kan en tlan theih nan Thawhtanni hi sikul chawlh puan a ni e’ tiin hriattirna an chhuah.

CLS Academy pawhin ‘sikul tan ni atana ruat, July 20, 2026 hi World Cup final tuk chiah a ni a. Nu leh paten hahdam zawka kan en theih nan July 21, 2026 (Thawhlehni)-ah sawn a ni’ tih an puang.

CLS Academy hian hriattirna an tihchhuahah flyer (milem) dah telin, “Kan chawlh chhan, World Cup chungchang CLS naupangten an hriat zau theih nan thlalak rawn dah a ni a. Thlalaka inziakte hi nu leh paten fate lo sawipuia lo chhiarpui turin kan inngen e,” an ti tel.

Mizoram pum huapa mi mal enkawl sikul hriat hlawh ber zinga mi, Chaltlang, Aizawla Mount Carmel School chuan Thawhlehnia sikul luh hun tura an tih chu sawnin, ‘World Cup Football final hi mahni in lum theuha zirlaiten lungmuang tak, hahdam tak leh hlim taka an en tlan theih nan’ tiin ruahmanna thar an siam a. A tuk, Nilainia luh turin an ti a. Hosteller (boarder)-te chu Thawhlehnia luh turin an ti.

Kids World Elementary School pawhin Thawhtanni chu chawlhah an puang a. Sikul leh pre-school thenkhat, sikul tan hun pangngai aia tlai hreta tan tur pawh an awm nual tih ZALEN chuan thu a dawng bawk.

World Cup final hi India-a Thawhtanni tukah Argentina leh Spain ten an khel dawn a. Kumin hian tum dang ang bawkin World Cup thlipuiin Mizote pawh a nuai na hle a, jersey hralh pawh a kalin a zuar tam tak chuan an chah daih lo hial hlawm niin an sawi.

(Thlalak hi AI hmanga siam a ni)