Fifa World Cup tum ngaa inlan thei hmasa ber, Mexican football legend Antonio Carbajal chu kum 93 mi niin a thi.

‘El Cinco Copas’ tia an sawi mai thin goalkeeper hi Brazil 1950, Switzerland 1954, Sweden 1958, Chile 1962 leh England 1966 World Cup-ah te khan an ram tan goal a lo veng tawh a ni.

Carbajal-a record hi kum 32 zet a din hnuah kum 1998 khan Germany captain Lothar Matthaus chuan a nihrual ta chauh a ni.

Ram tan vawi 48 chauh a inlan phak a; mahse, heng zinga vawi 11 hi World Cup-ah a ni thung a, club tan vawi 409 a khel bawk.

Kum 18 a inkhelh chhungin a hun tam ber chu Mexico-a Club Leon-ah a khel a, kum 16 a awm chhungin vawi 364 zet a khelhsak.

Club chuan an ui thu sawiin Ningani hian fan-ten zahna leh thlahna an lantir theih nan an khelmual chu an hawng dawn tih an sawi.

“Don Antonio, legends never die,” tiin club hian thuchhuah an siam a. “I hnung kan zui zel ang a, i team kan ni hi kan inchhuang hle a ni,” an ti.

Club hian an fan-te hnenah, “Chawimawina, zahna leh hmangaihna nen, kan legend hlu bik hi i thlah ang u,” an ti bawk.

Carbajal-a nen hian World Cup vawi ngaa inlan thei hi paruk an awm a, pahnih dang hi Mexican tho an ni.

Mexico midfielder Andres Guardado-a khan nikuma Qatar-ah khan a vawi nga nan World Cup-ah a inlan a, Argentina legend Lionel Messi leh Portugal captain Cristiano Ronaldo te an ni bawk.

Rafael Marquez chu kum 2018 khan Mexico tan a vawi nga nan a inlan bawk a, Carbajal leh Matthaus-a hnung a zui chiah a ni.

Fifa President Gianni Infantino chuan, “Fifa World Cup vawi ngaa inlan thei hmasa ber, Antonio Carbajal-a’n min kalsan tih hriat chuan min tilungngai a. A chhungte leh Mexican fan zawng zawngte ka tawrhpuina ka thawn a ni,” a ti.