June 21 hi rimawi ni 'World Music Day' a ni a, he ni pual hian Mizoramah pawh hman a ni dawn. Mizo Zaimi Inzawmkhawm (MZI) bultumin a lawmna buatsaih a ni dawn a, zaninah Hyve, Aizawl City Hall-ah hman a ni ang. He hun hi Micky Chhangte leh Sangtei Chhakchhuak ten an host dawn a, Minister R.  Lalzirliana leh AMC Mayor Lalrinenga Sailo ten an hmanpui ang. 

He hunah hian zaithiam hrang hrang an zai dawn a, thusawi a awm bawk ang. MZI president David Z. Hmar chuan inlawmna thu a sawi ang a, Zoramchhani, Saiwannah & Henz, K. Lalthlamuankimi leh Jonathan Lianhna te an zai zui ang. Anni bakah hian artist tha tak tak - Rosy K. Remsangpuii, TBC Zaithanpuia, Israela Pachuau, Tetei Ralte, Lallawmawma, SM Bawihtlung, Francis, Vanlalhmangaiha, Mazuali K leh Israel Lalbiakrema te an zai bawk ang. 

World Music Day programme hi LPS 10 leh Zonet Bawhbel-ahte live-a pekchhuah a ni ang a, MZI Official Youtube Channel-ah en theih a ni bawk ang.