Indian star Rohan Bopanna chu tennis World No. 1 ni thei upa ber a ni ta a, kum 43 mi hi a kawppui, Matthew Ebden nen Australian Open khelh mekah doubles semi-final lutin No. 1 an ni ta.

Bopanna leh Australian Ebden inkawp hian Argentine tang dun, Maximo Gonzalez leh Andres Molteni chu 6-4 7-6 (7-5)-in an hneh a ni.

Bopanna hi world ranking-a a chung ber a luah vawi khatna a ni nghe nghe.

“Khawvel mihring zawng zawngin kum 40 leh a chung lam chin chu a nihna an hria a, keimahah chuan a dang zawngin min tiphur a ni,” a ti.

Bopanna leh Ebden hian semifinal-ah Tomas Machac leh Zhang Zhizhen an hmachhawn zui ang.

Bopanna hi ATP Masters 1,000 champion upa ber a lo ni tawh bawk a, Ebden nen hian season hmasa khan March thlaah Indian Wells doubles-ah nomawi an lo la tawh.

Kum 2003 atangin professional huangah lutin Grand Slam mixed doubles-ah Canadian Gabriela Dabrowski nen inkawpin 2017 French Open-ah an lo champion tawh bawk.

Bopanna chuan kum upa tak ni tawh chunga hetiang a thlen theih chhanah hian a physiotherapist leh Iyengar yoga chu a fak hle.

“Ka physio hnenah hian ka mamawh bik ka hrilh a, ka khupah harsatna ka nei tawh a, chu chu tha takin min tihbosak a ni,” a ti.

“Yoga hian ka ke chauh a tichak lo va, ka taksa pawh a tichak a, tennis court chhunga zaidawh taka ka awm theih chhan pawh a ni a. Tha zawka ka insawrbing theihna turin min pui a, court-ah hian phur hlut ang chi ka neih loh phah,” a ti.

Bopanna hi Thawhtannia world ranking tihchhuah turah a chung berah a awm dawn ta a. Ebden nen point an hmuh zat a inang chiah a; mahse, Australian hian hun inanga vawi thumin tournament a khel tam zawk a ni.

Mipa doubles No. 1 ni thei upa ber chu Mike Bryan niin kum 41 leh ni 76 a nihin a ni thei.

Serena Williams chu hmeichhe maltana No. 1 ni thei upa ber niin kum 35 mi a nihin a ni a. Roger Federer chu mipa maltana No. 1 upa ber ni thei niin kum 36 a ni a. Novak Djokovic pawh hetiang kum a nihah hian kuminah a ni thei dawn bawk.

David Wagner chu kum 2018 khan kum 44 mi niin quad wheelchair ranking-ah No. 1 a lo ni tawh bawk.