World Wrestling Entertainment (WWE) leh UFC parent company Endeavor Group te chuan thawhhona thuthlung siamin an inchhunfin a, company thar an din. Inremna hi siam fel a la ni lo a, company thar tur hming pawh puanzar a la ni lo. 

WWE leh UFC inchhunfin hlut zawng hi $tld 21 vel a ni a, UFC hlut zawng hi $tld 12.1 niin WWE aiin a hlu zawk. Hetih lai hian WWE hlut zawng nia chhut chu $tld 9.3 a ni. UFC lam Endeavor hian neitu nihna pawh an chang tam zawk dawn a, 51% thu neihna an nei ang. An share hi a inthlau dawn lo a, WWE chuan 49% an chang thung dawn a ni - Endeavor CEO Ariel Emanuel chu company tharah hian CEO a nih chhunzawm bawk ang. 

Endeavor CEO Ariel Emanuel chuan global live sports leh entertainment inchhunfin chu thil thleng khat tak a nih thu a sawi. Emanuel hi Hollywood powerhouse agent ti hiala an sawi thin a ni a, mi thil tithei tak a ni. 

WWE hotupa Vince McMahon chuan company tharah hian executive chairman a nihna a chhawm thei dawn lo a, mipat hmeichhiatna lamah hming chhiatna a neih vang a ni. 

WWE hian tun hnaiah an hlutna an hloh a, 10% vel laiin a tlahniam. UFC nen inremna tluantling an siam fel hunah chuan $mtd 50 atanga $mtd 100 vel an hum thei tura ngaih a ni - inremna tluantling siam tur hian kawng zawh tur a la thui a, kum chanve hnu lamah an tihfel theih chauhin a rinawm.