Chinese comapny thangduang Xiaomi chuan huang an zauh zel a, electric car an rawn chhawpchhuak leh dawn ta. Xiaomi hian smartphone siam chhuah kawngah nasa takin hma an sawn a, India ramah phei chuan an kutchhuakte hi hralh a kal rem rem thin hle. 

Smartphone chauh an buaipui lo a, electric car siam chhuah lam pawh an hawi leh ta - hralh a kal leh viau tura ngai ang. Hemi chungchang hi tun hnai khan tarlangin, battery-electric leh extended-range powertrain an tichhuak dawn tih an sawi. Hemi atan hian engineer pawh an rawih belh nual a, an hmunpui Beijing-ah hma an la tan mup mup tawh a ni. 

Tarlan dan chuan an model hniam ber hian 400V voltage platform leh BYD Blade Battery a hmang dawn a, an model sang ber chuan 800V voltage platform leh CATL Qilin Battery a hmang dawn a ni - a battery capacity pawh 101kWh lai a ni.

Xiaomi car hmasa ber tur hi a changkang viau dawn a, Qualcomm Snapdragon 8295 chipset leh Apple CarPlay pawh a support thlap dawn. Xiaomi electric car hi tun hnai maia tihchhuah tur erawh a ni lo a, kum 2024 atangin a siam chhuah tak tak hna hi an thawk tan dawn a ni.