Aizawl April 16, 2023 :  Central Young Lai Association chuan Lai Autonomous District Council-in India hmarchhak state danga autonomous district council-ten thuneihna ang a neih theihna turin hmalak an rel.

Zirtawpni khan YLA Hall, College veng, Lawngtlai-ah YLA rorel inkhawm vawi 5-na neih a ni a. Rorel Inkhawm hi Central YLA President HC. Vanlalruatpuia’n kaihruaiin rorel palai mi 212 an kal a, Central YLA Adviser Thathluna Chinzah-in Central YLA website, centralyla.org a tlangzarh. 

YLA rorel inkhawmah hian Hlukhla Kût hlung taka hman a nih zel theihna tur leh LADC calendar-a kum tin tar lan a nih theihna turin hmalak ni se an ti a. Hei bakah hian Lai tawng inzirtirna lama hma kan sawn theih nan hmalak ni se tih leh LADC huam chhunga environment humhalh chungchangah hmalak ni se, an ti bawk.

YLA rorel inkhawma General Secretary Joseph Lalhmingthanga Chinzah report-a a lan danin Central YLA hnuaiah hian sub-headquarters pasarih, group paruk, joint pahnih leh branch 115 awmin YLA member 56,369 an awm.